Imran Khan: ଇମ୍ରାନ ଖାନ୍‌ଙ୍କୁ ଭାରତ ଛାଡ଼ିବାକୁ ମୁମ୍ବାଇ ପୋଲିସର ନୋଟିସ୍, ଅକ୍ଟୋବର ୨୮ ଯାଏଁ ଡେଡ୍‌ଲାଇନ୍

Imran Khan: ବଲିଉଡ୍ ଅଭିନେତା ତଥା ସୁପରଷ୍ଟାର ଆମିର ଖାନ୍‌ଙ୍କ ଭଣଜା ଇମ୍ରାନ ଖାନ୍‌ଙ୍କୁ ଭାରତ ଛାଡ଼ିବାକୁ ନୋଟିସ୍ ଜାରି କରିଛି ମୁମ୍ବାଇ ପୋଲିସ। ମୁମ୍ବାଇରେ ବ୍ୟଙ୍ଗାତ୍ମକ ରାଜନୈତିକ ଗୋଷ୍ଠୀ ‘କକ୍‌ରୋଚ୍ ଜନତା ପାର୍ଟି’ (CJP) ପକ୍ଷରୁ ଆୟୋଜିତ ଏକ ପ୍ରତିବାଦରେ ସାମିଲ ହେବାର କିଛି ଦିନ ପରେ ଏହି ପଦକ୍ଷେପ ନିଆଯାଇଛି। ପୋଲିସର ନୋଟିସ୍ ଅନୁଯାୟୀ, ଇମ୍ରାନଙ୍କୁ ଅକ୍ଟୋବର ୨୮ ସୁଦ୍ଧା ଭାରତ ଛାଡ଼ିବାକୁ କୁହାଯାଇଛି।

ପୋଲିସର କହିବା ଅନୁଯାୟୀ, ଇମ୍ରାନ ଭାରତୀୟ ନାଗରିକ ନ ହୋଇ ମଧ୍ୟ ପ୍ରତିବାଦରେ ଯୋଗ ଦେଇଥିବାରୁ ଇମିଗ୍ରେସନ୍ ଆଇନର ସମ୍ପୃକ୍ତ ବ୍ୟବସ୍ଥା ଅନୁସାରେ ତାଙ୍କ ବିରୋଧରେ ପଦକ୍ଷେପ ନିଆଯାଇଛି। ଇମ୍ରାନଙ୍କ ପାଖରେ ଆମେରିକାର ନାଗରିକତା ଥିବା ଏବଂ ସେ ଭାରତୀୟ ନାଗରିକତା ବଦଳରେ ଓଭରସିଜ୍ ସିଟିଜେନ୍ ଅଫ୍ ଇଣ୍ଡିଆ (OCI) କାର୍ଡ ଧାରଣ କରିଥିବା କୁହାଯାଉଛି।

ଅକ୍ଟୋବର ୧୦ ତାରିଖରେ ମୁମ୍ବାଇର ଅଗଷ୍ଟ କ୍ରାନ୍ତି ମୈଦାନରେ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ବିରୋଧରେ ଆୟୋଜିତ ପ୍ରତିବାଦରେ ଇମ୍ରାନ ଯୋଗ ଦେଇଥିଲେ। ତାଙ୍କ ସହ ତାଙ୍କ ସାଥୀ ଅଭିନେତ୍ରୀ ଲେଖା ୱାଶିଂଟନ୍ ଏବଂ ସମ୍ପର୍କୀୟ ଜାୟନ୍ ମାରି ଖାନ୍ ମଧ୍ୟ ଉପସ୍ଥିତ ଥିଲେ। ପ୍ରତିବାଦ ସମୟରେ ଏହି ତିନିଜଣଙ୍କୁ ପୋଲିସ ଅଟକ ରଖିଥିଲା। ପରେ ସେମାନଙ୍କୁ ଛାଡ଼ି ଦିଆଯାଇଥିଲା।

ଅଟକ ରହିବା ସମୟରେ ଇମ୍ରାନ ପୋଲିସ ଭ୍ୟାନ୍ ଭିତରୁ ଏକ ଫଟୋ ସୋସିଆଲ୍ ମିଡିଆରେ ପୋଷ୍ଟ କରିଥିଲେ। ଏହା ସହିତ ସେ ଲେଖିଥିଲେ, “ବୋଧହୁଏ ମୁଁ ଗାଡ଼ିରେ ବୁଲିବାକୁ ଯାଉଛି।” ଏହାଛଡ଼ା ଏକ ଭିଡିଓରେ ସେ ପୋଲିସକୁ ‘ଜୟ ହିନ୍ଦ୍’ କହୁଥିବା ଶୁଣିବାକୁ ମିଳିଥିଲା।

ଅନ୍ୟ ଏକ ଭିଡିଓରେ ଇମ୍ରାନ କହିଥିଲେ ଯେ, ତାଙ୍କୁ କାହିଁକି ଅଟକ ରଖାଯାଇଛି ସେ ଜାଣିନାହାନ୍ତି। ରାସ୍ତାରୁ ସେମାନଙ୍କୁ ଧରି ଆଣି ପୋଲିସ ଭ୍ୟାନ୍‌ରେ ବସାଇ ଦିଆଯାଇଥିଲା ବୋଲି ସେ କହିଥିଲେ। ତାଙ୍କ ଦାବି ଅନୁସାରେ, ଛାଡ଼ିବା ପୂର୍ବରୁ ପ୍ରାୟ ଦୁଇ ଘଣ୍ଟା ଧରି ସେମାନଙ୍କୁ ପୋଲିସ ଭ୍ୟାନ୍‌ରେ ବୁଲାଯାଇଥିଲା।

ଏହି ପ୍ରତିବାଦ ସମୟରେ ପୋଲିସ ପ୍ରାୟ ୪୦୦ ଜଣଙ୍କୁ ଅଟକ ରଖିଥିଲା। ଏଥିରେ ତୁଷାର ଗାନ୍ଧୀଙ୍କ ନେତୃତ୍ୱାଧୀନ ‘ହମ୍ ଭାରତ କେ ଲୋଗ୍’ ସଂଗଠନର ସଦସ୍ୟ ଏବଂ ଭାରତର କମ୍ୟୁନିଷ୍ଟ ପାର୍ଟି (ମାର୍କ୍ସବାଦୀ)ର କର୍ମୀମାନେ ମଧ୍ୟ ସାମିଲ ଥିଲେ।

ଇମ୍ରାନ ଖାନ୍‌ଙ୍କୁ ଜାରି ହୋଇଥିବା ନୋଟିସ୍ ଏବେ ଚର୍ଚ୍ଚାର ବିଷୟ ପାଲଟିଛି। ତେବେ ଏହି ମାମଲାରେ ପୋଲିସର ପଦକ୍ଷେପ ଏବଂ ଆଗାମୀ ଆଇନଗତ ପ୍ରକ୍ରିୟା ଉପରେ ସମସ୍ତଙ୍କ ନଜର ରହିଛି।