Saudi Arabia attack: ସାଉଦି ଆରବରେ ବଢ଼ୁଛି ଯୁଦ୍ଧ ଆଶଙ୍କା! ଆକ୍ରମଣରେ ଭାରତୀୟ ଆହତ, ଦୂତାବାସର ତତ୍ପରତା

Saudi Arabia attack: ସାଉଦି ଆରବରେ ଆକ୍ରମଣକୁ ନେଇ ବଢ଼ିଛି ଚିନ୍ତା। ଦେଶର ପୂର୍ବାଞ୍ଚଳରେ ଥିବା ଦମ୍ମାମସ୍ଥିତ କିଙ୍ଗ ଫହଦ ଅନ୍ତର୍ଜାତୀୟ ବିମାନବନ୍ଦରରେ ବୁଧବାର ସନ୍ଧ୍ୟାରେ ଆକ୍ରମଣ ହୋଇଥିବା ସୂଚନା ମିଳିଛି। ସାଉଦି ସିଭିଲ୍ ଏଭିଏସନ୍ ଅଥରିଟି ଅନୁଯାୟୀ, ଏହି ଘଟଣାରେ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିବାବେଳେ ଅନ୍ୟ ୮ ଜଣ ଆହତ ହୋଇଛନ୍ତି। ଆହତଙ୍କ ମଧ୍ୟରୁ କିଛିଙ୍କ ଅବସ୍ଥା ସାମାନ୍ୟ ଥିବାବେଳେ ଅନ୍ୟ କିଛିଙ୍କ ସ୍ଥିତି ଗୁରୁତର ରହିଥିବା ଜଣାପଡ଼ିଛି।

ବିମାନବନ୍ଦରରେ କେଉଁ ପ୍ରକାରର ଆକ୍ରମଣ ହୋଇଛି ଏବଂ ଏଥିରେ କେତେ ପରିମାଣର କ୍ଷୟକ୍ଷତି ହୋଇଛି, ତାହାର ଆକଳନ କରାଯାଉଛି। ଆକ୍ରମଣର ପ୍ରକୃତ କାରଣ ଓ ଏହା ପଛରେ କାହାର ହାତ ରହିଛି, ସେନେଇ ତୁରନ୍ତ ସ୍ପଷ୍ଟ ସୂଚନା ମିଳିନାହିଁ।

ଶୈବା ତୈଳ କ୍ଷେତ୍ରରେ ଆକ୍ରମଣ, ଭାରତୀୟ ନାଗରିକ ଆହତ:
ସାଉଦି ଆରବର ଶୈବା ତୈଳ କ୍ଷେତ୍ରରେ ହୋଇଥିବା ଆକ୍ରମଣରେ ଜଣେ ଭାରତୀୟ ନାଗରିକ ଆହତ ହୋଇଛନ୍ତି। ସାଉଦି ଆରବସ୍ଥିତ ଭାରତୀୟ ଦୂତାବାସ ଏହି ସୂଚନା ଦେଇଛି।

ଦୂତାବାସ ସୋସିଆଲ୍ ମିଡିଆ ପ୍ଲାଟଫର୍ମ ଏକ୍ସରେ ଏକ ପୋଷ୍ଟ୍ କରି କହିଛି ଯେ, ଶୈବା ତୈଳ କ୍ଷେତ୍ରରେ ହୋଇଥିବା ଆକ୍ରମଣରେ ଜଣେ ଭାରତୀୟ ଆହତ ହୋଇଥିବା ଖବର ମିଳିଛି। ଏହି ଘଟଣା ସମ୍ପର୍କରେ ଦୂତାବାସ ସାଉଦି କର୍ତ୍ତୃପକ୍ଷଙ୍କ ସହ ଯୋଗାଯୋଗରେ ରହିଛି ଏବଂ ଅଧିକ ସୂଚନାକୁ ଅପେକ୍ଷା କରିଛି। ଆହତ ଭାରତୀୟଙ୍କୁ ସମସ୍ତ ସମ୍ଭାବ୍ୟ ସହାୟତା ଯୋଗାଇ ଦିଆଯିବ ବୋଲି ଦୂତାବାସ ଆଶ୍ୱାସନା ଦେଇଛି। ଶୈବା ତୈଳ କ୍ଷେତ୍ର ସାଉଦି ଆରବର ଏକ ପ୍ରମୁଖ ତୈଳ ଉତ୍ପାଦନ କେନ୍ଦ୍ର। ତେଣୁ ଏଠାରେ ହୋଇଥିବା ଆକ୍ରମଣକୁ ନେଇ ଶକ୍ତି ଉତ୍ପାଦନ ଓ ଆଞ୍ଚଳିକ ସୁରକ୍ଷାକୁ ନେଇ ଚିନ୍ତା ବଢ଼ିଛି।

ସାଉଦି ଆରବ ଛାଡ଼ିବାକୁ ଆମେରିକୀୟ କର୍ମଚାରୀଙ୍କୁ ନିର୍ଦ୍ଦେଶ:
ସାଉଦି ଆରବରେ ବଢ଼ୁଥିବା ସୁରକ୍ଷା ଆଶଙ୍କା ମଧ୍ୟରେ ଆମେରିକା ମଧ୍ୟ ଏକ ବଡ଼ ପଦକ୍ଷେପ ନେଇଛି। ଆମେରିକାର ବୈଦେଶିକ ବିଭାଗ ସାଉଦି ଆରବରେ ନିୟୋଜିତ ଅଣ-ଅତ୍ୟାବଶ୍ୟକ ଦୂତାବାସ କର୍ମଚାରୀ ଏବଂ ସେମାନଙ୍କ ପରିବାର ସଦସ୍ୟଙ୍କୁ ଦେଶ ଛାଡ଼ିବାକୁ ନିର୍ଦ୍ଦେଶ ଦେଇଥିବା କହିଛି।

ୟେମେନର ଇରାନ୍ ସମର୍ଥିତ ହୁତି ବିଦ୍ରୋହୀଙ୍କ ପକ୍ଷରୁ ସାଉଦି ଆରବ ଉପରେ ଲଗାତାର ଆକ୍ରମଣ ହେଉଥିବା ଆଶଙ୍କା ମଧ୍ୟରେ ଏହି ନିଷ୍ପତ୍ତି ନିଆଯାଇଛି। ତେବେ ଦମ୍ମାମ ବିମାନବନ୍ଦର ଓ ଶୈବା ତୈଳ କ୍ଷେତ୍ରରେ ହୋଇଥିବା ଆକ୍ରମଣ ପଛରେ ହୁତି ବିଦ୍ରୋହୀଙ୍କ ସିଧାସଳଖ ସମ୍ପୃକ୍ତି ରହିଛି କି ନାହିଁ, ତାହା ସ୍ୱତନ୍ତ୍ର ଭାବେ ସ୍ପଷ୍ଟ ହୋଇନାହିଁ।

ମଧ୍ୟପ୍ରାଚ୍ୟରେ ବଢ଼ୁଛି ଉତ୍ତେଜନା:
ବିମାନବନ୍ଦର ଓ ତୈଳ ଉତ୍ପାଦନ କେନ୍ଦ୍ରକୁ ନେଇ ଆସିଥିବା ଏହି ଆକ୍ରମଣ ଖବର ସାଉଦି ଆରବର ସୁରକ୍ଷା ବ୍ୟବସ୍ଥା ଉପରେ ଚିନ୍ତା ବଢ଼ାଇଛି। ଅନ୍ୟପଟେ, ଆମେରିକାର ଦୂତାବାସ କର୍ମଚାରୀଙ୍କୁ ଦେଶ ଛାଡ଼ିବା ନିର୍ଦ୍ଦେଶ ଆଞ୍ଚଳିକ ପରିସ୍ଥିତିର ଗମ୍ଭୀରତାକୁ ଦର୍ଶାଉଛି।

ବର୍ତ୍ତମାନ ଆହତ ଭାରତୀୟଙ୍କ ସ୍ୱାସ୍ଥ୍ୟାବସ୍ଥା, ଆକ୍ରମଣର ପ୍ରକୃତ କାରଣ ଏବଂ ବିମାନବନ୍ଦରର କ୍ଷୟକ୍ଷତି ସମ୍ପର୍କରେ ଅଧିକ ତଥ୍ୟକୁ ଅପେକ୍ଷା କରାଯାଇଛି। ଏହି ଘଟଣାଗୁଡ଼ିକର ପରବର୍ତ୍ତୀ ବିକାଶ ଉପରେ ଅନ୍ତର୍ଜାତୀୟ ମହଲର ନଜର ରହିଛି।