Japan Earthquake: ଜାପାନରେ ଭୟଙ୍କର ଭୂକମ୍ପ, ୫.୭ ତୀବ୍ରତାର ଝଟକାରେ ଥରିଲା ମଧ୍ୟ ଜାପାନ; ଅନେକ ଆହତ
ଜାପାନୀ ଗଣମାଧ୍ୟମ 'ଦି ମାଇନିଚି'ର ରିପୋର୍ଟ ଅନୁଯାୟୀ, ଜାପାନ ପାଣିପାଗ ସଂସ୍ଥା (JMA) ଅନୁସାରେ ସ୍ଥାନୀୟ ସମୟ ରବିବାର ରାତି ୧ଟା ୦୪ ମିନିଟ୍ରେ ଏହି ଭୂକମ୍ପ ହୋଇଥିଲା। ଏହାର କେନ୍ଦ୍ରସ୍ଥଳ ଶିଜୁଓକା ପ୍ରିଫେକ୍ଚରର ପଶ୍ଚିମ ଭାଗରେ ରହିଥିବା ବେଳେ ଭୂପୃଷ୍ଠଠାରୁ ପ୍ରାୟ ୪୦ କିଲୋମିଟର ଗଭୀରତାରେ ଭୂକମ୍ପ ସୃଷ୍ଟି ହୋଇଥିଲା।
Japan Earthquake: ଜାପାନରେ ପୁଣି ଭୂକମ୍ପ ଆତଙ୍କ। ରବିବାର ସକାଳେ ମଧ୍ୟ ଜାପାନରେ ୫.୭ ତୀବ୍ରତାର ଏକ ଶକ୍ତିଶାଳୀ ଭୂକମ୍ପ ଅନୁଭୂତ ହୋଇଛି। ଭୂକମ୍ପର ଝଟକାରେ ଅନେକ ଅଞ୍ଚଳ ଥରି ଉଠିଥିବା ବେଳେ ଡଜନାଧିକ ଲୋକ ଆହତ ହୋଇଥିବା ଜାପାନୀ ଗଣମାଧ୍ୟମ ରିପୋର୍ଟରୁ ଜଣାପଡ଼ିଛି। ଘଟଣା ପରେ ସ୍ଥିତି ଉପରେ ନଜର ରଖିବା ଏବଂ ଉଦ୍ଧାର କାର୍ଯ୍ୟ ସମନ୍ୱୟ ପାଇଁ ସରକାରଙ୍କ ପକ୍ଷରୁ ଏକ ଜରୁରୀକାଳୀନ ପ୍ରତିକ୍ରିୟା କାର୍ଯ୍ୟାଳୟ ଖୋଲାଯାଇଛି।
ଜାପାନୀ ଗଣମାଧ୍ୟମ 'ଦି ମାଇନିଚି'ର ରିପୋର୍ଟ ଅନୁଯାୟୀ, ଜାପାନ ପାଣିପାଗ ସଂସ୍ଥା (JMA) ଅନୁସାରେ ସ୍ଥାନୀୟ ସମୟ ରବିବାର ରାତି ୧ଟା ୦୪ ମିନିଟ୍ରେ ଏହି ଭୂକମ୍ପ ହୋଇଥିଲା। ଏହାର କେନ୍ଦ୍ରସ୍ଥଳ ଶିଜୁଓକା ପ୍ରିଫେକ୍ଚରର ପଶ୍ଚିମ ଭାଗରେ ରହିଥିବା ବେଳେ ଭୂପୃଷ୍ଠଠାରୁ ପ୍ରାୟ ୪୦ କିଲୋମିଟର ଗଭୀରତାରେ ଭୂକମ୍ପ ସୃଷ୍ଟି ହୋଇଥିଲା।
ଅନେକ ଅଞ୍ଚଳରେ ଅନୁଭୂତ ହେଲା ଝଟକା:
ଭୂକମ୍ପର ପ୍ରଭାବ ଆଇଚି ପ୍ରିଫେକ୍ଚରର ଚିତା ଅଞ୍ଚଳରେ ଅଧିକ ଅନୁଭୂତ ହୋଇଥିଲା। ଜାପାନର ଭୂକମ୍ପ ତୀବ୍ରତା ମାପକ ଅନୁସାରେ ଏଠାରେ ୫ରୁ ଅଧିକ ତୀବ୍ରତା ରେକର୍ଡ କରାଯାଇଥିଲା। ଏହାବ୍ୟତୀତ ଆଇଚି, ନାଗାନୋ ଓ ଗିଫୁ ପ୍ରିଫେକ୍ଚରର ବିଭିନ୍ନ ଅଞ୍ଚଳରେ ମଧ୍ୟ ଭୂକମ୍ପର ଝଟକା ଅନୁଭୂତ ହୋଇଥିଲା। ଫଳରେ ମଧ୍ୟ ଜାପାନର ଏକ ବିସ୍ତୃତ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି।
ଭୂକମ୍ପ ପରେ ଆସିଲା ଏକାଧିକ ଝଟକା:
ମୁଖ୍ୟ ଭୂକମ୍ପ ପରେ ମଧ୍ୟ ଛୋଟ ଛୋଟ ଝଟକା ଅନୁଭୂତ ହୋଇଥିବା ଜଣାପଡ଼ିଛି। ପରିସ୍ଥିତିର ମୁକାବିଲା ଏବଂ ପ୍ରଭାବିତ ଅଞ୍ଚଳର ସ୍ଥିତି ଆକଳନ କରିବା ପାଇଁ ଜାପାନ ସରକାର ଏକ ସ୍ୱତନ୍ତ୍ର ଯୋଗାଯୋଗ ଓ ସମନ୍ୱୟ କାର୍ଯ୍ୟାଳୟ ଗଠନ କରିଛନ୍ତି। ଅନ୍ୟପଟେ ଭୂକମ୍ପ ପରବର୍ତ୍ତୀ ସ୍ଥିତି ଉପରେ ଜାପାନ ପାଣିପାଗ ସଂସ୍ଥା ନିରନ୍ତର ନଜର ରଖିଛି।
ସୁନାମି ଆଶଙ୍କା ନାହିଁ, ତଥାପି ସତର୍କ ରହିବାକୁ ପରାମର୍ଶ:
ଏହି ଭୂକମ୍ପ ପରେ ସୁନାମି ଆସିବାର କୌଣସି ବିପଦ ନଥିବା ଜାପାନ ପାଣିପାଗ ସଂସ୍ଥା ସ୍ପଷ୍ଟ କରିଛି। ତେବେ ମୁଖ୍ୟ ଭୂକମ୍ପ ପରେ ଆହୁରି ଝଟକା ଆସିବାର ସମ୍ଭାବନାକୁ ନେଇ ଚିନ୍ତା ବଢ଼ିଛି। ଅଧିକାରୀମାନେ ଭୂକମ୍ପୀୟ କାର୍ଯ୍ୟକଳାପ ଉପରେ ନଜର ରଖିବା ସହ ପ୍ରଭାବିତ ଅଞ୍ଚଳର ସ୍ଥିତି ଅନୁଧ୍ୟାନ କରୁଛନ୍ତି।
