Delhi Traffic Advisory: ଇଣ୍ଡିଆ ମେଣ୍ଟର ରାଲି ପାଇଁ ରାଜଧାନୀରେ ଟ୍ରାଫିକ୍ କଟକଣା, ୧୦ଟି ଛକରେ ଡାଇଭର୍ସନ୍
SIR ପ୍ରକ୍ରିୟାରେ ପ୍ରାୟ ୧୩ କୋଟି ଭୋଟରଙ୍କ ନାମ କଟାଯାଇଥିବା ଅଭିଯୋଗ ଏବଂ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କୁ ପଦରୁ ହଟାଇବା ଦାବିରେ ଏହି ରାଲି ଆୟୋଜନ କରାଯାଉଛି। ଏଥିପାଇଁ ସକାଳ ୧୦ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ଟ୍ରାଫିକ୍ ନିୟନ୍ତ୍ରଣ ଜାରି ରହିବ। ଆବଶ୍ୟକତା ଅନୁସାରେ ବିଭିନ୍ନ ରାସ୍ତାରେ ଡାଇଭର୍ସନ୍ ମଧ୍ୟ କରାଯାଇପାରେ।
Delhi Traffic Advisory: ରବିବାର ଦିଲ୍ଲୀରେ ଯାତାୟାତ ଉପରେ ପଡ଼ିପାରେ ବଡ଼ ପ୍ରଭାବ। ନଭେମ୍ବର ୧ ତାରିଖରେ ରାମଲୀଳା ମୈଦାନରେ ଇଣ୍ଡିଆ ମେଣ୍ଟ ପକ୍ଷରୁ ଆୟୋଜିତ ହେବାକୁ ଥିବା ରାଲିକୁ ଦୃଷ୍ଟିରେ ରଖି ଦିଲ୍ଲୀ ଟ୍ରାଫିକ୍ ପୋଲିସ ପକ୍ଷରୁ ସ୍ୱତନ୍ତ୍ର ଟ୍ରାଫିକ୍ ଆଡଭାଇଜରି ଜାରି କରାଯାଇଛି। ରାଲିରେ ବହୁ ସଂଖ୍ୟାରେ ଲୋକଙ୍କ ସମାଗମ ହେବାର ଆଶଙ୍କା ଥିବାରୁ ମଧ୍ୟ ଦିଲ୍ଲୀର ଅନେକ ପ୍ରମୁଖ ରାସ୍ତାରେ ଯାତାୟାତ ନିୟନ୍ତ୍ରଣ କରାଯିବ।
SIR ପ୍ରକ୍ରିୟାରେ ପ୍ରାୟ ୧୩ କୋଟି ଭୋଟରଙ୍କ ନାମ କଟାଯାଇଥିବା ଅଭିଯୋଗ ଏବଂ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କୁ ପଦରୁ ହଟାଇବା ଦାବିରେ ଏହି ରାଲି ଆୟୋଜନ କରାଯାଉଛି। ଏଥିପାଇଁ ସକାଳ ୧୦ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ଟ୍ରାଫିକ୍ ନିୟନ୍ତ୍ରଣ ଜାରି ରହିବ। ଆବଶ୍ୟକତା ଅନୁସାରେ ବିଭିନ୍ନ ରାସ୍ତାରେ ଡାଇଭର୍ସନ୍ ମଧ୍ୟ କରାଯାଇପାରେ।
୧୦ଟି ପ୍ରମୁଖ ଛକରେ ରହିବ ଟ୍ରାଫିକ୍ ପୋଲିସର ନଜର:
ଟ୍ରାଫିକ୍ ପୋଲିସ ପକ୍ଷରୁ ୧୦ଟି ସ୍ଥାନକୁ ଡାଇଭର୍ସନ୍ ପଏଣ୍ଟ ଭାବେ ଚିହ୍ନଟ କରାଯାଇଛି। ସେଗୁଡ଼ିକ ହେଲା ନେତାଜୀ ସୁଭାଷ ମାର୍ଗ ଟି-ପଏଣ୍ଟ, ରାଜଘାଟ, ଦିଲ୍ଲୀ ଗେଟ୍, ଆଇଟିଓ ଏ-ପଏଣ୍ଟ, ଅଜମେରୀ ଗେଟ୍ ରେଡ୍ ଲାଇଟ୍, ବାରାଖମ୍ବା ରୋଡ୍ର ରଣଜିତ ସିଂହ ଫ୍ଲାଏଓଭର, ଭବଭୂତି ମାର୍ଗ-ଦୀନଦୟାଳ ଉପାଧ୍ୟାୟ ମାର୍ଗ ରେଡ୍ ଲାଇଟ୍, ଝଣ୍ଡେୱାଲାନ୍ ଗୋଲଚକ୍କର, ତୁର୍କମାନ ଗେଟ୍ ଏବଂ ମୀରଦର୍ଦ ଚୌକ।
ଏହାବ୍ୟତୀତ ବାହାଦୁର ଶାହ ଜଫର ମାର୍ଗ, ଜବାହରଲାଲ ନେହେରୁ ମାର୍ଗ, ଅରୁଣା ଆସଫ ଅଲ୍ଲୀ ରୋଡ୍, ମିଣ୍ଟୋ ରୋଡ୍, ଡିବିଜି ରୋଡ୍ ଏବଂ ବାରାଖମ୍ବା ରୋଡ୍ରେ ମଧ୍ୟ ଯାତାୟାତ ପ୍ରଭାବିତ ହୋଇପାରେ। କମଳା ମାର୍କେଟ୍ ଗୋଲଚକ୍କର ଓ ହମଦର୍ଦ ଚୌକ ନିକଟରେ ମଧ୍ୟ ଗାଡ଼ି ଚାଳକଙ୍କୁ ଟ୍ରାଫିକ୍ ଜାମ୍ର ସାମ୍ନା କରିବାକୁ ପଡ଼ିପାରେ।
ଏହି ରାସ୍ତାଗୁଡ଼ିକରେ ଯାତାୟାତ ନିୟନ୍ତ୍ରଣ:
ଗୁରୁ ନାନକ ଚୌକରୁ କମଳା ମାର୍କେଟ୍ ଗୋଲଚକ୍କର, କମଳା ମାର୍କେଟ୍ରୁ ହମଦର୍ଦ ଚୌକ, ହମଦର୍ଦ ଚୌକରୁ ତୁର୍କମାନ ଗେଟ୍ ଏବଂ ତୁର୍କମାନ ଗେଟ୍ରୁ ଗୁରୁ ନାନକ ଚୌକ ପର୍ଯ୍ୟନ୍ତ ଗାଡ଼ି ଚଳାଚଳକୁ ପରିସ୍ଥିତି ଅନୁଯାୟୀ ନିୟନ୍ତ୍ରଣ କରାଯିବ। ଟ୍ରାଫିକ୍ ସ୍ଥିତିକୁ ଦେଖି ବାହାଦୁର ଶାହ ଜଫର ମାର୍ଗ, ରାଜଘାଟରୁ ଜେଏଲଏନ୍ ମାର୍ଗ, ଡିବିଜି ରୋଡ୍ ଏବଂ ମିଣ୍ଟୋ ରୋଡ୍ରେ ଡିଟିସି ବସ୍ ଚଳାଚଳ ମଧ୍ୟ ସୀମିତ କରାଯାଇପାରେ।
ରେଳଯାତ୍ରୀଙ୍କ ପାଇଁ ମଧ୍ୟ ପରାମର୍ଶ:
ରାଲି ଯୋଗୁଁ ରେଳଷ୍ଟେସନ୍ ଯାଉଥିବା ଯାତ୍ରୀମାନେ ଅଧିକ ସମୟ ହାତରେ ରଖି ଘରୁ ବାହାରିବାକୁ ଟ୍ରାଫିକ୍ ପୋଲିସ ପରାମର୍ଶ ଦେଇଛି।
ଡିବିଜି ରୋଡ୍ ପଟୁ ଆସୁଥିବା ଯାତ୍ରୀମାନେ ଚେମ୍ସଫୋର୍ଡ ରୋଡ୍, କନଟ୍ ପ୍ଲେସ୍ର ଆଉଟର ସର୍କଲ୍, ମିଣ୍ଟୋ ରୋଡ୍ ଏବଂ ଭବଭୂତି ମାର୍ଗ ବ୍ୟବହାର କରିପାରିବେ। ସେହିପରି ପୂର୍ବ ଦିଲ୍ଲୀରୁ ଆସୁଥିବା ଯାତ୍ରୀମାନେ ଆଇଟିଓ, ଦୀନଦୟାଳ ଉପାଧ୍ୟାୟ ମାର୍ଗ ଏବଂ ଭବଭୂତି ମାର୍ଗ ଦେଇ ଅଜମେରୀ ଗେଟ୍ରେ ପହଞ୍ଚିପାରିବେ।
ଯଦି ଡିଡିୟୁ ମାର୍ଗରେ ଯାତାୟାତ ବାଧାପ୍ରାପ୍ତ ହୁଏ, ତେବେ ଆଇଟିଓ ରେଡ୍ ଲାଇଟ୍, ଡବ୍ଲ୍ୟୁ-ପଏଣ୍ଟ, ସିକନ୍ଦରା ରୋଡ୍, କନଟ୍ ପ୍ଲେସ୍, ପହାଡ଼ଗଞ୍ଜ ଏବଂ ଚେମ୍ସଫୋର୍ଡ ରୋଡ୍ ଦେଇ ଷ୍ଟେସନ୍ରେ ପହଞ୍ଚିବାର ବିକଳ୍ପ ରହିଛି। ତେଣୁ ରବିବାର ଦିଲ୍ଲୀରେ ଯାତ୍ରା କରିବାକୁ ଥିବା ଲୋକେ ଘରୁ ବାହାରିବା ପୂର୍ବରୁ ଟ୍ରାଫିକ୍ ଆଡଭାଇଜରି ଯାଞ୍ଚ କରିବା ସହ ନିଜ ଗନ୍ତବ୍ୟସ୍ଥଳରେ ପହଞ୍ଚିବା ପାଇଁ ଅତିରିକ୍ତ ସମୟ ରଖିବା ଉଚିତ୍।
