ସୁରକ୍ଷା ଦରକାର, ପାବନ୍ଦୀ ନୁହେଁ: ରାସ୍ତାକୁ ଓହ୍ଲାଇଲେ ଡିୟୁ ଛାତ୍ରୀ, ନାରାରେ ଉଠିଲା ସ୍ୱାଧୀନତାର ପ୍ରଶ୍ନ

ନୂଆଦିଲ୍ଲୀ: ଦକ୍ଷିଣ ଦିଲ୍ଲୀର କାଲକାଜିସ୍ଥିତ ଆସ୍ଥା କୁଞ୍ଜ ପାର୍କରେ ୧୭ ବର୍ଷୀୟ ଜଣେ ନାବାଳିକାଙ୍କ ସହ କଥିତ ଗଣଦୁଷ୍କର୍ମ ଘଟଣା ପରେ ମହିଳା ସୁରକ୍ଷାକୁ ନେଇ ଦିଲ୍ଲୀ ବିଶ୍ୱବିଦ୍ୟାଳୟରେ ଛାତ୍ରୀଙ୍କ ପ୍ରତିବାଦ ତୀବ୍ର ହୋଇଛି। ଲେଡି ଶ୍ରୀରାମ କଲେଜ, ମିରାଣ୍ଡା ହାଉସ୍, ଗାର୍ଗୀ କଲେଜ ଓ କମଳା ନେହରୁ କଲେଜ ସମେତ ବିଭିନ୍ନ କଲେଜର ଛାତ୍ରୀମାନେ ଏହି ପ୍ରତିବାଦରେ ସାମିଲ ହୋଇଛନ୍ତି।

ସେପ୍ଟେମ୍ବର ୨୮ ଓ ୨୯ରେ ନର୍ଥ କ୍ୟାମ୍ପସରେ ମଧ୍ୟ ବଡ଼ ଧରଣର ମାର୍ଚ୍ଚ ହୋଇଥିଲା। ବର୍ଷା ସତ୍ତ୍ୱେ ଶତାଧିକ ଛାତ୍ରୀ ଓ କ୍ୱିୟର୍ ସମୁଦାୟର ସଦସ୍ୟମାନେ ଏଥିରେ ଯୋଗ ଦେଇଥିଲେ। ମିରାଣ୍ଡା ହାଉସ୍ ନିକଟରୁ ଆରମ୍ଭ ହୋଇଥିବା ମାର୍ଚ୍ଚ ଫ୍ୟାକଲ୍ଟି ଅଫ୍ ଆର୍ଟସ୍ ଅଞ୍ଚଳରେ ପହଞ୍ଚିଥିଲା।

ଛାତ୍ରୀମାନଙ୍କ ଦାବି କେବଳ ମହିଳା ସୁରକ୍ଷାରେ ସୀମିତ ନାହିଁ। କଲେଜ ଓ ହଷ୍ଟେଲ୍ ନିକଟରେ ଉପଯୁକ୍ତ ଷ୍ଟ୍ରିଟ୍ ଲାଇଟ୍, କାର୍ଯ୍ୟକ୍ଷମ CCTV, ନିୟମିତ ପୋଲିସ ପାଟ୍ରୋଲିଂ, ସୁରକ୍ଷିତ ପବ୍ଲିକ୍ ଟ୍ରାନ୍ସପୋର୍ଟ ଏବଂ ରାତିରେ ନିରାପଦ ଯାତାୟାତ ଭଳି ପଦକ୍ଷେପ ନେବାକୁ ସେମାନେ ଦାବି କରିଛନ୍ତି।

ପ୍ରତିବାଦରେ ଛାତ୍ରୀମାନଙ୍କ ହାତରେ ଥିବା ପୋଷ୍ଟର ଓ ନାରା ମଧ୍ୟ ଚର୍ଚ୍ଚାରେ ରହିଛି। ‘ହମ୍ ଔରତେଁ ଆଜାଦ୍ ହୈଁ’, ‘କ୍ୟୁଟି ନହିଁ, କ୍ରାନ୍ତି ହୈ ହମ୍’, ‘ରେପିଷ୍ଟ କୋ ଅନ୍ଦର କରୋ, ଲଡ଼କିଓଁ କୋ ନହିଁ’ ଏବଂ ‘ଡର୍ କେ ଆଗେ ଆଜାଦୀ’ ଭଳି ନାରା ଦିଆଯାଇଥିଲା। କିଛି ପୋଷ୍ଟରରେ ବ୍ୟଙ୍ଗାତ୍ମକ ଭାଷାରେ ମଧ୍ୟ ମହିଳାଙ୍କ ସୁରକ୍ଷା ଓ ସ୍ୱାଧୀନତାର ପ୍ରଶ୍ନ ଉଠାଯାଇଛି।

ଛାତ୍ରୀମାନଙ୍କ ମୁଖ୍ୟ ଯୁକ୍ତି ହେଉଛି, ମହିଳାଙ୍କ ସୁରକ୍ଷା ପାଇଁ ରାତିରେ ବାହାରକୁ ନଯିବା, କର୍ଫ୍ୟୁ ବଢ଼ାଇବା କିମ୍ବା ମହିଳାଙ୍କ ଚଳାଚଳ ଉପରେ ଅଧିକ ପାବନ୍ଦୀ ଲଗାଇବା ପରିବର୍ତ୍ତେ ସାର୍ବଜନୀନ ସ୍ଥାନକୁ ଅଧିକ ସୁରକ୍ଷିତ କରାଯିବା ଆବଶ୍ୟକ। ଏହି କାରଣରୁ ‘ବେଟି କି ଲୋକେସନ୍ ନହିଁ, ବେଟେ କା ଇଣ୍ଟେଣ୍ଟ ଚେକ୍ କରୋ’ ଭଳି ସ୍ଲୋଗାନ୍ ମଧ୍ୟ ନଜରକୁ ଆସିଛି।

ଏହି ଆନ୍ଦୋଳନ ଏକ ନିର୍ଦ୍ଦିଷ୍ଟ ଘଟଣାକୁ ନେଇ ଆରମ୍ଭ ହୋଇଥିଲେ ମଧ୍ୟ, ଡିୟୁ ଛାତ୍ରୀମାନେ ଦିଲ୍ଲୀର ସାର୍ବଜନୀନ ସ୍ଥାନରେ ମହିଳାଙ୍କ ନିରାପଦ ଚଳାଚଳ, ଭିତ୍ତିଭୂମି, ପରିବହନ ଓ ପୋଲିସ ବ୍ୟବସ୍ଥାକୁ ନେଇ ବ୍ୟାପକ ଦାବି ରଖିଛନ୍ତି।