IT କମ୍ପାନୀରେ ଅଗ୍ନିକାଣ୍ଡ; ୫ ଜଣ ହସ୍ପିଟାଲରେ ଭର୍ତ୍ତି
ନିଆଁ ଲାଗିବା ସମୟରେ ବିଲ୍ଡିଂରେ ପ୍ରାୟ ୪୦ ଜଣ ଉପସ୍ଥିତ ଥିଲେ। ସେମାନଙ୍କ ମଧ୍ୟରୁ ଅଧିକାଂଶ କର୍ମଚାରୀ ଥିଲେ।
Ahmedabad IT Company Fire Case: ଅହମ୍ମଦାବାଦର ଥଲତେଜ ସ୍ଥିତ ମ୍ୟାଗ୍ନେଟ୍ କର୍ପୋରେଟ୍ ପାର୍କ (IT Park)ରେ ସୋମବାର ବିଳମ୍ବିତ ରାତିରେ ଭୟାବହ ଅଗ୍ନିକାଣ୍ଡ ଘଟିଛି । ନିଆଁ କାରଣରୁ ଅନେକ ଲୋକ ଆହତ ହୋଇଛନ୍ତି। ଆହତମାନଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି। ଘଟଣା ସମ୍ପର୍କରେ ସୂଚନା ମିଳିବା ମାତ୍ରେ ଅଗ୍ନିଶମ ବାହିନୀର ଅନେକ ଗାଡ଼ି ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ଅଗ୍ନିକାଣ୍ଡରେ ପ୍ରବଳ କ୍ଷୟକ୍ଷତି ହୋଇଛି। ଏହି ଅଗ୍ନିକାଣ୍ଡ ଘଟଣାରେ ଅତିକମରେ ପାଞ୍ଚ ଜଣ ଆହତ ହୋଇଥିବା ସୂଚନା ମିଳିଛି। ସେମାନଙ୍କ ମଧ୍ୟରୁ ଦୁଇ ଜଣ ଏଭଳି ଅଛନ୍ତି, ଯେଉଁମାନେ ନିଆଁ ଲାଗିବା ପରେ ବାହାରକୁ ଆସିବା ସମୟରେ ପୋଡ଼ି ହୋଇ ଗୁରୁତର ଆହତ ହୋଇଛନ୍ତି।
ଅଗ୍ନିଶମ ବିଭାଗର ଜଣେ ଅଧିକାରୀଙ୍କ କହିବାନୁଯାୟୀ, ଥଲତେଜସ୍ଥିତ ମ୍ୟାଗ୍ନେଟ୍ କର୍ପୋରେଟ୍ ପାର୍କର ବୈଦ୍ୟୁତିକ କେବୁଲ୍ ଡକ୍ଟ (Electric Cable Duct)ରେ ନିଆଁ ଲାଗିବା ସୂଚନା ପାଇବା ପରେ, ଅହମ୍ମଦାବାଦ ଫାୟାର୍ ଆଣ୍ଡ ଏମରଜେନ୍ସି ସର୍ଭିସେସ୍ (AFES)ର ୧୨ଟି ଦମକଳ ଗାଡ଼ି ଘଟଣାସ୍ଥଳକୁ ପଠାଯାଇଥିଲା। ଅଗ୍ନିଶମ ବିଭାଗ କହିଛି ଯେ, ଦମକଳ ଗାଡ଼ି ପହଞ୍ଚିବା ପୂର୍ବରୁ ହିଁ ଜଣେ ବ୍ୟକ୍ତି ଉପରୁ ତଳକୁ ଡେଇଁପଡ଼ିଥିଲେ।
ସୂଚନା ଅନୁସାରେ, ଏହି ନିଆଁ ବିଲ୍ଡିଂର ଦ୍ୱିତୀୟ ମହଲାରେ ଲାଗିଥିଲା, ଯେଉଁଥିରେ ବିଶେଷ କରି ପ୍ରଥମ ଏବଂ ଦ୍ୱିତୀୟ ମହଲା ସବୁଠାରୁ ଅଧିକ ପ୍ରଭାବିତ ହୋଇଛି। ନିଆଁ ଲାଗିବା ସମୟରେ ବିଲ୍ଡିଂରେ ପ୍ରାୟ ୪୦ ଜଣ ଉପସ୍ଥିତ ଥିଲେ। ସେମାନଙ୍କ ମଧ୍ୟରୁ ଅଧିକାଂଶ କର୍ମଚାରୀ ଥିଲେ। ଏହି ଘଟଣାକୁ ନେଇ ଅନ୍ୟ ଜଣେ ଅଗ୍ନିଶମ ଅଧିକାରୀ କହିଛନ୍ତି ଯେ, ଦମକଳ ଗାଡ଼ି ପହଞ୍ଚିବା ପୂର୍ବରୁ ହିଁ ଅନେକ ଲୋକ ବାହାରକୁ ଚାଲିଆସିଥିଲେ। ସେହିପରି, AFES ଟିମ୍ ୮ ଜଣ ଲୋକଙ୍କୁ ସୁରକ୍ଷିତ ଭାବେ ବାହାରକୁ ଉଦ୍ଧାର କରିଥିଲେ।
କୁହାଯାଉଛି ଯେ ବିଲ୍ଡିଂ ଭିତରେ ରଖାଯାଇଥିବା ଆସବାବପତ୍ର କାରଣରୁ ନିଆଁ ଆଖି ପିଛୁଳାକେ ବ୍ୟାପିଯାଇଥିଲା । ଯାହାଫଳରେ ଅଞ୍ଚଳରେ ପ୍ରବଳ ଧୂଆଁ ଦେଖିବାକୁ ମିଳିଥିଲା । ସ୍ଥିତି ଏପରି ହୋଇଥିଲା ଯେ, ବିଲଡିଂରୁ ବାହାରକୁ ବାହାରିବା ମଧ୍ୟଲୋକମାନଙ୍କ ପାଇଁ କଷ୍ଟକର ହୋଇପଡ଼ିଥିଲା। ନିଆଁ ଲାଗିବାର ପ୍ରକୃତ କାରଣର ଯାଞ୍ଚ କରାଯାଉଛି। ଘଟଣାକୁ ନେଇ ଅଧିକାରୀମାନେ କହିଛନ୍ତି ଯେ, ଦୁର୍ଘଟଣାରେ ଆହତ ତିନି ଜଣଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ଘଟଣାରେ ଅନ୍ୟ ଦୁଇ ଜଣଙ୍କୁ ବେସରକାରୀ ଗାଡ଼ି ସାହାଯ୍ୟରେ ସୋଲା ସିଭିଲ୍ ହସ୍ପିଟାଲକୁ ନିଆଯାଇଛି।
ଜଣାପଡିଛି ଯେ, ସମସ୍ତ ଆହତମାନଙ୍କ ବୟସ ୨୦ ରୁ ୫୦ ବର୍ଷ ମଧ୍ୟରେ। ଆହତମାନଙ୍କ ମଧ୍ୟରୁ କେତେକ ଗୁରୁତର ଭାବେ ଆହତ ହୋଇଛନ୍ତି । ଗୁରୁତର ଆହତମାନଙ୍କୁ ଡାକ୍ତରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ରଖାଯାଇଛି। ସୋମବାର ବିଳମ୍ବିତ ରାତି ସୁଦ୍ଧା ସେମାନଙ୍କ ଅବସ୍ଥା ସ୍ଥିର ଥିଲା। ଡାକ୍ତରମାନେ କହିଛନ୍ତି ଯେ, ୨୦ ଏବଂ ୩୫ ବର୍ଷର ଦୁଇଜଣ ରୋଗୀ ବାହାରକୁ ଆସିବା ଚେଷ୍ଟାରେ ଦ୍ୱିତୀୟ ଏବଂ ତୃତୀୟ ମହଲାରୁ ଡେଇଁବା ଯୋଗୁଁ ଆହତ ହୋଇଛନ୍ତି। ସେମାନଙ୍କ ମୁଣ୍ଡରେ କୌଣସି ଆଘାତ ଲାଗିନାହିଁ ଏବଂ ସେମାନଙ୍କ ଅବସ୍ଥା ଏବେ ସ୍ଥିର ଅଛି। ଅନ୍ୟପଟେ, ଆଉ ଜଣେ ରୋଗୀଙ୍କୁ ସାମାନ୍ୟ ଆଘାତ ଲାଗିଛି । ହସ୍ପିଟାଲରେ ସମସ୍ତ ଆହତଙ୍କର ଚିକିତ୍ସା କରାଯାଉଛି।
Also Read- Cyclone Murasu: ବାତ୍ୟା 'ମୁରାସୁ' ପ୍ରଭାବ, ଉଡିଲା ଛପର ଭାଙ୍ଗିଲା ଗଛ...
