Top 10 News: ଆଜି ଖୋଲିବ ହୀରାକୁଦ ଗେଟ୍, ସମ୍ଭାବ୍ୟ ବାତ୍ୟା ‘ମୁରାସୁ’ ସ୍ଥିତି ଓ ଅନ୍ୟ ଖବର

Top 10 News Today

Headlines 01- ୨୨ କିମି ବେଗରେ ଆଗକୁ ବଢୁଛି ଦକ୍ଷିଣ ପୂର୍ବ ବଙ୍ଗୋପସାଗରର ଅବପାତ । ବିଗତ ୬ ଘଣ୍ଟା ଧରି ୨୨ କିମି ବେଗରେ ଅବପାତ ଆଗକୁ ବଢୁଥିବା ସୂଚନା ମିଳିଛି । ଚେନ୍ନାଇରୁ ୮୩୦ କିମି, ବିଶଖାପଟ୍ଟନମରୁ ୮୮୦ କିମି ଦୂରରେ ଅବପାତ ରହିଛି । ଆଜି ବାତ୍ୟା ଓ କାଲି ଭୀଷଣ ବାତ୍ୟାରେ ପରିଣତ ହେବାର ସମ୍ଭାବନା ଥିବା କୁହାଯାଉଛି । ୩ ତାରିଖ ସକାଳେ ସମ୍ଭାବ୍ୟ ‘ମୁରାସୁ’ ବାତ୍ୟା ଦକ୍ଷିଣ ଆନ୍ଧ୍ର ପ୍ରଦେଶ ଉପକୂଳ ଅତିକ୍ରମ କରିବା ନେଇ ଆକଳନ କରାଯାଉଛି । ନେଲୁର ଏବଂ ନରସାପୁର ମଧ୍ୟରେ ଉପକୂଳ ଅତିକ୍ରମ କରିବାର ସମ୍ଭାବନା ରହିଛି । ପବନ ବେଗ ୧୦୦ ରୁ ୧୧୦କିମି, ଝଟକା ପବନ ୧୨୦କିମି ରହିପାରେ ।

Headlines 02- ଦୀପାବଳି ପୂର୍ବରୁ ଗ୍ରାହକଙ୍କ ପାଇଁ ଝଟକା ଦେବା ପରି ଖବର ଆସିଛି । ସରକାର କମର୍ସିଆଲ୍ LPG ସିଲିଣ୍ଡର ମୂଲ୍ୟ ବଢ଼ାଇଛନ୍ତି। ନଭେମ୍ବର ୧ ତାରିଖରୁ ୧୯ କିଲୋଗ୍ରାମ ବିଶିଷ୍ଟ କମର୍ସିଆଲ୍ LPG ସିଲିଣ୍ଡର ମୂଲ୍ୟରେ ଏହି ବୃଦ୍ଧି ହୋଇଛି। ଏବେ ଦେଶର ରାଜଧାନୀ ଦିଲ୍ଲୀରେ କମର୍ସିଆଲ୍ ସିଲିଣ୍ଡର ୧୦ ଟଙ୍କା ମହଙ୍ଗା ହୋଇଛି, ଯାହାର ନୂଆ ମୂଲ୍ୟ ୨,୮୨୦ ଟଙ୍କା ହୋଇଯାଇଛି।

Headlines 03- ଜାମ୍ମୁ କାଶ୍ମୀର ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ଦ୍ୱିତୀୟ ବିବାହ କରିଛନ୍ତି । ୫୬ ବର୍ଷ ବୟସରେ ବରିଷ୍ଠ ସାମ୍ୱାଦିକା ନିଧି ରାଜଦାନଙ୍କୁ ବିବାହ କରିଛନ୍ତି ଓମାର । ବିବାହ ସମୟର ଫଟୋ ଏବେ ସୋସିଆଲ ମିଡିଆରେ ସାମ୍ନାକୁ ଆସିଛି । ବିବାହ ପରେ ଉଭୟଙ୍କୁ ପ୍ରିୟଜନ ଏବଂ ପ୍ରଶଂସକମାନେ ଶୁଭେଚ୍ଛା ଜଣାଇଛନ୍ତି ।

Headlines 04- ଦୁର୍ନୀତି ବିରୋଧରେ ଏକ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରି ଓଡ଼ିଶା ଭିଜିଲାନ୍ସ ଆଜି ଛତ୍ରପୁର ଉପ-ଜିଲ୍ଲାପାଳଙ୍କ କାର୍ଯ୍ୟାଳୟର ପୂର୍ବତନ ବରିଷ୍ଠ ରାଜସ୍ୱ ସହକାରୀ (SRA) ସଦାଶିବ ପ୍ରଧାନଙ୍କୁ ପ୍ରାୟ ୮,୬୩,୨୦୦ ଟଙ୍କାର ସରକାରୀ ଅର୍ଥ ହେରଫେର ଅଭିଯୋଗରେ ଗିରଫ କରିଛି। ସେ ବର୍ତ୍ତମାନ ଗଞ୍ଜାମ ଜିଲ୍ଲାର ସୋରଡ଼ା ତହସିଲ କାର୍ଯ୍ୟାଳୟରେ କାର୍ଯ୍ୟରତ ଅଛନ୍ତି।

Headlines 05- ରାଜ୍ୟ ସରକାର କିଛି ନିର୍ଦ୍ଦିଷ୍ଟ ଅଞ୍ଚଳରେ ସରକାରୀ ଅଧିକାରୀଙ୍କ ଛୁଟି ବାତିଲ୍ କରିଛନ୍ତି । କନ୍ଧମାଳ ଜିଲ୍ଲାରେ ରବିବାର ଦିନ ସରକାରୀ କାର୍ଯ୍ୟାଳୟ ଖୋଲା ରହିବ । ସମ୍ଭାବ୍ୟ ବାତ୍ୟାକୁ ଦୃଷ୍ଟିରେ ରଖି ରବିବାର ପାଇଁ ଛୁଟି ବାତିଲ୍ କରାଯାଇଛି । ସରକାରୀ ଅଧିକାରୀ ମାନେ ରବିବାର ଉପସ୍ଥିତ ରହିବାକୁ ନିର୍ଦ୍ଦେଶ ଦିଆଯାଇଛି । ଅନୁପସ୍ଥିତ ରହିଲେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ନେଇ ପ୍ରଶାସନ ପକ୍ଷରୁ ନିଷ୍ପତ୍ତି ନିଆଯାଇଛି ।

Headlines 06- ଗଞ୍ଜାମରେ ରବିବାର ଦିନ ସରକାରୀ କାର୍ଯ୍ୟାଳୟ ଖୋଲା ରହିବ । ବନ୍ୟା ସ୍ଥିତିକୁ ଦୃଷ୍ଟିରେ ରଖି ରିଲିଫ କାର୍ଯ୍ୟ ପାଇଁ ଛୁଟି ବାତିଲ୍ କରାଯାଇଛି । ସରକାରୀ ଅଧିକାରୀ ମାନେ ରବିବାର ଉପସ୍ଥିତ ରହିବାକୁ ନିର୍ଦ୍ଦେଶ ଦିଆଯାଇଛି । ଗଞ୍ଜାମ ଜିଲ୍ଲାରେ ସବୁ ସ୍କୁଲ ଆସନ୍ତା ୩ ତାରିଖ ଯାଏଁ ଛୁଟି ଘୋଷଣା କରାଯାଇଛି । ପ୍ରେସମିଟ୍‌ରେ ଏନେଇ ସୂଚନା ଦେଇଛନ୍ତି ଗଞ୍ଜାମ ଜିଲ୍ଲାପାଳ । ବନ୍ୟା ସ୍ଥିତିକୁ ଦୃଷ୍ଟିରେ ରଖି ଜିଲ୍ଲାପାଳ ଏହି ନିଷ୍ପତ୍ତି ନେଇଛନ୍ତି ।

Headlines 07- ହୀରାକୁଦରେ ଜଳସ୍ତର ବଢିବା କାରଣରୁ ଆଜି ଅପରାହ୍ନରେ ଖୋଲାଯିବ ଗେଟ୍‌ । ଉପର ମୁଣ୍ଡରେ ବର୍ଷା କାରଣରୁ ଗେଟ୍‌ ଖୋଲିବା ନେଇ କର୍ତ୍ତୃପକ୍ଷ ନିଷ୍ପତ୍ତି ନେଇଛନ୍ତି । ବର୍ତ୍ତମାନର ଜଳସ୍ତର ୬୨୯.୧ ଫୁଟ ରହିଛି । ଜଳଧାରଣ କ୍ଷମତା ୬୩୦ ଫୁଟ୍ ହୋଇଥିବା ସମୟରେ ୧୪୧୭୭୯ ଘନଫୁଟ ଜଳ ପ୍ରବେଶ କରୁଛି ଏବଂ ୩୩୭୭୮ ଘନଫୁଟ ଜଳ ନିଷ୍କାସିତ ହେଉଛି ।

Headlines 08- ୭ ମାସ ପାଇଁ ମାଛ ଧରିବା ଉପରେ କଟକଣା ଜାରି କରାଯାଇଛି । ମିସନ ଅଲିଭ ରିଡଲେ ପାଇଁ ୩ ସମୁଦ୍ର ତଟରେ କଟକଣା ଲାଗୁ ହୋଇଛି । ନଭେମ୍ବର ୧ରୁ ମେ ୩୧ ପର୍ଯ୍ୟନ୍ତ ଲାଗୁ ହୋଇଛି କଟକଣା । ଋଷିକୂଲ୍ୟା, ଧାମରା ଓ ଦେବୀ ନଦୀ ମୁହାଣରେ ମାଛ ମାରିବା ନିଷେଧ । କୂଳ ଠାରୁ ୨୦ କିମି ପର୍ଯ୍ୟନ୍ତ ସମୁଦ୍ରରେ ମାଛ ମରା ନିଷେଧ କରିଛି ପ୍ରଶାସନ ।

Headlines 09- ଭଞ୍ଜନଗର ଗିଡ଼ିପାବାଲି ଭୂସ୍ଖଳନ ଘଟଣାରେ ଉଦ୍ଧାର କାର୍ଯ୍ୟ ପୁନର୍ବାର ଆରମ୍ଭ ହୋଇଛି । ଗତକାଲି ପ୍ରବଳ ବର୍ଷା ହେବାରୁ ଉଦ୍ଧାର କାର୍ଯ୍ୟ ବାଧାପ୍ରାପ୍ତ ହୋଇଥିଲା । ଉଦ୍ଧାର କାର୍ଯ୍ୟରେ ଓଡ୍ରାଫ୍, NDRF ଓ ଅଗ୍ନିଶମର ୯ଟି ଟିମ୍ ନିୟୋଜିତ ଅଛନ୍ତି । ୧୩ ନିଖୋଜଙ୍କ ମଧ୍ୟରୁ ଗତକାଲି ଜଣଙ୍କ ମୃତଦେହ ଉଦ୍ଧାର ହୋଇଥିଲା ।

Headlines 10- ଆଗାମି କିଛି ଦିନ ପାଇଁ ରାଜ୍ୟର ଅନେକ ଜିଲ୍ଲାକୁ ଆଲର୍ଟ ଜାରି କରିଛି ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ର । ଆଜିଠାରୁ ଆସନ୍ତାକାଲି ସକାଳ ୮ଟା ୩୦ ଯାଏଁ ବଜ୍ରପାତ ନେଇ ମୟୂରଭଞ୍ଜ, କେନ୍ଦୁଝର, ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡା, କଟକ, ଜଗତସିଂହପୁର, ଖୋର୍ଦ୍ଧା, ପୁରୀ, ନୟାଗଡ, ଗଞ୍ଜାମ, ଗଜପତି, ରାୟଗଡା, କୋରାପୁଟ ଏବଂ ମାଲକାନଗିରି ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି ।