Cyclone Alert: ବଙ୍ଗୋପସାଗରରେ ଘନୀଭୂତ ହେଉଛି ଲଘୁଚାପ, ୧୬ରେ ବାତ୍ୟା ରୂପ ନେବା ସମ୍ଭାବନା!

Cyclone Alert: ବଙ୍ଗୋପସାଗରରେ ଦାନା ବାନ୍ଧୁଛି ଆଉ ଏକ ଶକ୍ତିଶାଳୀ ପାଣିପାଗ ପ୍ରଣାଳୀ। ଦକ୍ଷିଣ-ପୂର୍ବ ବଙ୍ଗୋପସାଗର ଉପରେ ସୃଷ୍ଟି ହୋଇଥିବା Well Marked Low Pressure Area ବା ସ୍ପଷ୍ଟ ଚିହ୍ନିତ ଲଘୁଚାପ କ୍ରମଶଃ ଘନୀଭୂତ ହେବାରେ ଲାଗିଛି। ଏହା ଆଗାମୀ ୨୪ ଘଣ୍ଟା ମଧ୍ୟରେ ଅବପାତର ରୂପ ନେଇପାରେ। ପରବର୍ତ୍ତୀ ସମୟରେ ଏହା ଆହୁରି ଶକ୍ତିଶାଳୀ ହୋଇ ବାତ୍ୟାରେ ପରିଣତ ହେବା ସହ ୧୬ ନଭେମ୍ବର ସନ୍ଧ୍ୟା ଆଡ଼କୁ ଦକ୍ଷିଣ ଓ ତତ୍‌ସଂଲଗ୍ନ ପଶ୍ଚିମ-କେନ୍ଦ୍ରୀୟ ବଙ୍ଗୋପସାଗର ଉପରେ ରହିବାର ସମ୍ଭାବନା ରହିଛି।

ଭୁବନେଶ୍ୱର ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ୧୪ ନଭେମ୍ବରରେ ଜାରି ସ୍ୱତନ୍ତ୍ର ବୁଲେଟିନ୍‌ ଅନୁଯାୟୀ, ଏହି ଲଘୁଚାପ ସହ ଜଡ଼ିତ ଘୂର୍ଣ୍ଣିବଳୟ ସମୁଦ୍ର ପତ୍ତନଠାରୁ ପ୍ରାୟ ୭.୬ କିଲୋମିଟର ଉଚ୍ଚତା ପର୍ଯ୍ୟନ୍ତ ବିସ୍ତାର କରିଛି। ଏହା ଉତ୍ତର-ପଶ୍ଚିମ ଦିଗକୁ ଗତି କରିବା ସହ ଧୀରେ ଧୀରେ ଶକ୍ତି ବୃଦ୍ଧି କରିବାର ଆକଳନ କରାଯାଇଛି।

ଧୀରେ ଧୀରେ ବଢ଼ିବ ପ୍ରଣାଳୀର ଶକ୍ତି:
ପାଣିପାଗ ବିଭାଗର ପୂର୍ବାନୁମାନ ଅନୁସାରେ, ନଭେମ୍ବର ୧୫ରେ ଏହା ଅବପାତ ଏବଂ ୧୬ ନଭେମ୍ବର ସକାଳ ସୁଦ୍ଧା ଗଭୀର ଅବପାତରେ ପରିଣତ ହୋଇପାରେ। ୧୬ ନଭେମ୍ବର ସନ୍ଧ୍ୟା ଆଡ଼କୁ ଏହା ବାତ୍ୟାର ରୂପ ନେବା ସମ୍ଭାବନା ରହିଛି। ପରେ ଏହାର ତୀବ୍ରତା ଆହୁରି ବଢ଼ି ୧୮ ନଭେମ୍ବର ସକାଳ ସୁଦ୍ଧା ଭୀଷଣ ବାତ୍ୟାର ରୂପ ନେଇପାରେ ବୋଲି ପ୍ରାରମ୍ଭିକ ଆକଳନରେ ଉଲ୍ଲେଖ ରହିଛି।

ଓଡ଼ିଶାର ୧୬ ଜିଲ୍ଲା ପାଇଁ ପାଣିପାଗ ସତର୍କତା:
ପାଣିପାଗ କେନ୍ଦ୍ରର ୧୮ ନଭେମ୍ବର ପାଇଁ ଜାରି ଜିଲ୍ଲାୱାରୀ ଚେତାବନୀ ମାନଚିତ୍ର ଅନୁଯାୟୀ, ରାଜ୍ୟର ୧୬ଟି ଜିଲ୍ଲାରେ ପ୍ରବଳ ବର୍ଷା, ବଜ୍ରପାତ ସହ ଝଡ଼ବର୍ଷା ଏବଂ ଘଣ୍ଟାପ୍ରତି ୪୦ରୁ ୫୦ କିଲୋମିଟର ବେଗରେ ପବନ ବହିବାର ସମ୍ଭାବନା ରହିଛି।

ଏହି ଜିଲ୍ଲାଗୁଡ଼ିକ ହେଲା ମୟୂରଭଞ୍ଜ, କେନ୍ଦୁଝର, ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, ଜଗତସିଂହପୁର, କଟକ, ଖୋର୍ଦ୍ଧା, ପୁରୀ, ନୟାଗଡ଼, ଗଞ୍ଜାମ, ଗଜପତି, ରାୟଗଡ଼ା, କୋରାପୁଟ ଓ ମାଲକାନଗିରି।

ମାନଚିତ୍ରରେ ଏହି ଜିଲ୍ଲାଗୁଡ଼ିକୁ ହଳଦିଆ ରଙ୍ଗରେ ଦର୍ଶାଯାଇଛି। ଏଥିସହିତ କେତେକ ଅଞ୍ଚଳରେ ବଜ୍ରପାତ ସହ ଝଡ଼ବର୍ଷା ଏବଂ ଘଣ୍ଟାପ୍ରତି ୪୦-୫୦ କିଲୋମିଟର ବେଗରେ ପବନ ବହିବା ନେଇ ସଙ୍କେତ ଦିଆଯାଇଛି। ଅନ୍ୟପଟେ ମାନଚିତ୍ରରେ ସବୁଜ ରଙ୍ଗରେ ଦର୍ଶାଯାଇଥିବା ଜିଲ୍ଲାଗୁଡ଼ିକ ପାଇଁ କୌଣସି ଚେତାବନୀ ଜାରି କରାଯାଇନାହିଁ।

ପରିସ୍ଥିତି ଉପରେ ନଜର ରଖିବାକୁ ପରାମର୍ଶ:
ବଙ୍ଗୋପସାଗରରେ ଘନୀଭୂତ ହେଉଥିବା ଏହି ପାଣିପାଗ ପ୍ରଣାଳୀର ଗତିପଥ ଓ ତୀବ୍ରତା ଉପରେ ପାଣିପାଗ ବିଭାଗ ନଜର ରଖିଛି। ଲୋକମାନଙ୍କୁ ପାଣିପାଗ ବିଭାଗ ପକ୍ଷରୁ ଜାରି ହେଉଥିବା ନୂଆ ସୂଚନା ଓ ସତର୍କତା ପ୍ରତି ଧ୍ୟାନ ଦେବାକୁ ପରାମର୍ଶ ଦିଆଯାଉଛି।

ତେବେ ଏହି ପ୍ରଣାଳୀର ଗତିପଥ, ତୀବ୍ରତା ଏବଂ ଓଡ଼ିଶା ଉପରେ ଏହାର ସମ୍ଭାବ୍ୟ ପ୍ରଭାବ ସମ୍ପର୍କରେ ପରବର୍ତ୍ତୀ ପାଣିପାଗ ବୁଲେଟିନ୍‌ ଅଧିକ ସ୍ପଷ୍ଟ ଚିତ୍ର ଦେବ।