ଏମଏମଡିଆର ଆକ୍ଟକୁ ବିରୋଧ: କଂଗ୍ରେସ ଓ ଇଣ୍ଡିମେଣ୍ଟର ସହଯୋଗୀ ଦଳ ପକ୍ଷରୁ ଶୋଭାଯାତ୍ରା
ପ୍ରଥମେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଥିବା ମହାପୁରୁଷଙ୍କ ପ୍ରତିମୂର୍ତ୍ତିରେ ପୁଷ୍ପ ମାଲ୍ୟାର୍ପଣ କରିବା ପରେ ସିଧା ଯାଇ ସହରର କାଳିପଡିଆଠାରେ ଆୟୋଜିତ ବିରାଟ ପ୍ରତିବାଦ ସଭାକୁ ସମ୍ବୋଧନ କରିଥିଲେ ।
କେନ୍ଦୁଝର: ଏମଏମଡିଆର ଆକ୍ଟ କୁ ବିରୋଧ କରି କଂଗ୍ରେସ ଓ ଇଣ୍ଡିମେଣ୍ଟର ସହଯୋଗୀ ଦଳ ପକ୍ଷରୁ ଆଜି କେନ୍ଦୁଝର ସହରରେ ଏକ ବିଶାଳ ପ୍ରତିବାଦ ଶୋଭାଯାତ୍ରା ସହ ପ୍ରତିବାଦ ସଭା ଆୟୋଜନ କରାଯାଇଛି । ହଜାର ହଜାର କଂଗ୍ରେସ କର୍ମୀଙ୍କ ଗହଣରେ ରାଜ୍ୟ କଂଗ୍ରେସର ପ୍ରଭାରୀ ଲାଲାଜୀ ଦେସାଇଙ୍କ ସହ ପୂର୍ବତନ ପିସିସି ସଭାପତି ନିରଞ୍ଜନ ବେହେରା ବରିଷ୍ଠ ନେତା ତାରପ୍ରସାଦ ବାହିନିପତି ଓ ଅନେକ ରାଜ୍ୟ ସ୍ତରୀୟ ନେତା ପ୍ରାୟ ୧୨ ଟା ସମୟରେ ଜିଲ୍ଲା କଂଗ୍ରେସ୍ ଭବନରୁ ଏକ ବିରାଟ ଶୋଭାଯାତ୍ରାରେ ବାହାରିଥିଲେ ।
୨୦୨୪ରେ ନଅ ଜଣ ସୁପ୍ରିମ କୋର୍ଟର ସିଟିଂ ଜଜ ରାଜ୍ୟମାନେ ସେମାନଙ୍କର ଟ୍ୟାକ୍ସ ବସାଇ ପାରିବେ ବୋଲି କହିଥିଲେ, ହେଲେ ଏ ଆଇନ ଯେତେବେଳେ ଆସିଲା ସେତେବେଳେ କୋଡ଼ିଏ ଜଣ ଆମ ରାଜ୍ୟର ବିଜେପି ସାଂସଦ ମାନେ ପାଟି ଚୁପ୍ କରି ରହିଲେ ବିକ୍ରି ହୋଇଗଲେ । ଏହି ଜିଲ୍ଲାରୁ କୋଟି କୋଟି ଟଙ୍କାର ଖଣିଜ ଦ୍ରବ୍ୟ ବାହାରକୁ ଯାଉଛି ହେଲେ ଏଠିକାର ଆଦିବାସୀ ମାନଙ୍କର ବିକାଶ ହୋଇ ନାହିଁ ଏହି ଜିଲ୍ଲାରେ ଯୁବକ ଯୁବତୀମାନେ ଦାଦନ ଖଟିବାକୁ ଯାଉଛନ୍ତି । ସେମାନଙ୍କର ଆହୁରି ମଧ୍ୟ କହିବା କଥା ଦିଲ୍ଲୀରେ ବସିଥିବା ସରକାର ଆଉ ଏଠିକାର ସରକାର ତାଙ୍କର ସଖି କଣ୍ଡେଇ ସାଜିଛନ୍ତି ତାଙ୍କୁ ମଧ୍ୟ ଘେରାଉ କରିବୁ ଏହାକୁ ଆମେ ବର୍ଦ୍ଦାସ୍ତ କରିବୁ ନାହିଁ । ଆଜିର ପ୍ରତିବାଦରେ ରାଜ୍ୟ ସଭାପତି ଯୋଗ ଦେବାକୁ ଥିବାବେଳେ ସେ ନ ଆସିବା ନେଇ ବିଭିନ୍ନ ଚର୍ଚ୍ଚା ଲାଗିରହିଥିବା ବେଳେ ହଠାତ୍ ଅସୁସ୍ଥ ଲାଗିବାରୁ ସେ ଆସିପାରିନଥିବା କଂଗ୍ରେସ ନେତା ନବଜ୍ୟୋତି ପଟ୍ଟନାୟକ କହିଛନ୍ତି ।
