Asian Champions Trophy: ଏସିଆନ୍ ଚାମ୍ପିୟନ୍ସ ଟ୍ରଫି: ଜାପାନକୁ ୪-୧ ଗୋଲ୍ରେ ହରାଇ ସେମିଫାଇନାଲରେ ଭାରତ
ମ୍ୟାଚ୍ ଆରମ୍ଭରୁ ଜାପାନ ଆକ୍ରମଣାତ୍ମକ ଖେଳ ଦେଖାଇଥିଲା। ଦ୍ୱିତୀୟ ମିନିଟ୍ରେ ଦଳକୁ ପେନାଲ୍ଟି କର୍ଣ୍ଣର ମିଳିଥିଲେ ମଧ୍ୟ ଏହାକୁ ଗୋଲ୍ରେ ପରିଣତ କରିପାରିନଥିଲା। ଏହାର ଜବାବରେ ୧୧ତମ ମିନିଟ୍ରେ ଅଭିଷେକ ନୈନ ଗୋଲ୍ କରି ଭାରତକୁ ୧-୦ରେ ଆଗୁଆ କରିଥିଲେ।
Asian Champions Trophy 2026: ଏସିଆନ୍ ଚାମ୍ପିୟନ୍ସ ଟ୍ରଫି ୨୦୨୬ରେ ଭାରତୀୟ ହକି ଦଳର ଦମଦାର ପ୍ରଦର୍ଶନ ଜାରି ରହିଛି। ଶୁକ୍ରବାର ଖେଳାଯାଇଥିବା ମ୍ୟାଚ୍ରେ ଜାପାନକୁ ୪-୧ ଗୋଲ୍ରେ ପରାସ୍ତ କରି ଭାରତ କ୍ରମାଗତ ତୃତୀୟ ବିଜୟ ହାସଲ କରିଛି। ଏହି ବିଜୟ ସହ ପାଞ୍ଚ ଥରର ଚାମ୍ପିୟନ୍ ଭାରତୀୟ ଦଳ ସେମିଫାଇନାଲରେ ନିଜ ସ୍ଥାନ ପକ୍କା କରିଛି। ଏହା ପୂର୍ବରୁ ଭାରତ ବାଂଲାଦେଶ ଓ ଚୀନ୍କୁ ପରାସ୍ତ କରିଥିଲା।
ଏହି ମ୍ୟାଚ୍ରେ ଭାରତର ବିଜୟର ମୁଖ୍ୟ ନାୟକ ରହିଥିଲେ ଅଭିଷେକ ନୈନ। ସେ ଦୁଇଟି ଗୋଲ୍ ସ୍କୋର କରି ଦଳକୁ ବିଜୟ ଦିଗରେ ଆଗେଇ ନେଇଥିଲେ। ଅନ୍ୟପଟେ ଅଧିନାୟକ ହରମନପ୍ରୀତ ସିଂହ ଓ ବିଷ୍ଣୁକାନ୍ତ ସିଂହ ଗୋଟିଏ ଲେଖାଏଁ ଗୋଲ୍ ଦେଇଥିଲେ। ଜାପାନ ପକ୍ଷରୁ ଶୋତା ୟାମାଦା ଏକମାତ୍ର ଗୋଲ୍ କରିଥିଲେ।
ପ୍ରଥମାର୍ଦ୍ଧରେ ଜାପାନର କଡ଼ା ଟକ୍କର:
ମ୍ୟାଚ୍ ଆରମ୍ଭରୁ ଜାପାନ ଆକ୍ରମଣାତ୍ମକ ଖେଳ ଦେଖାଇଥିଲା। ଦ୍ୱିତୀୟ ମିନିଟ୍ରେ ଦଳକୁ ପେନାଲ୍ଟି କର୍ଣ୍ଣର ମିଳିଥିଲେ ମଧ୍ୟ ଏହାକୁ ଗୋଲ୍ରେ ପରିଣତ କରିପାରିନଥିଲା। ଏହାର ଜବାବରେ ୧୧ତମ ମିନିଟ୍ରେ ଅଭିଷେକ ନୈନ ଗୋଲ୍ କରି ଭାରତକୁ ୧-୦ରେ ଆଗୁଆ କରିଥିଲେ।
ତେବେ ୧୫ତମ ମିନିଟ୍ରେ ଜାପାନ ପକ୍ଷରୁ ଶୋତା ୟାମାଦା ପେନାଲ୍ଟି ଷ୍ଟ୍ରୋକ୍ ଜରିଆରେ ଗୋଲ୍ କରି ସ୍କୋରକୁ ୧-୧ କରିଦେଇଥିଲେ। ପ୍ରଥମାର୍ଦ୍ଧର ଅବଶିଷ୍ଟ ସମୟରେ ଉଭୟ ଦଳ ମଜବୁତ୍ ରକ୍ଷଣଭାଗର ଖେଳ ଦେଖାଇଥିଲେ। ଦ୍ୱିତୀୟ ଓ ତୃତୀୟ କ୍ୱାର୍ଟରରେ ମଧ୍ୟ କୌଣସି ଦଳ ଗୋଲ୍ କରିପାରିନଥିଲେ।
ଶେଷ କ୍ୱାର୍ଟରରେ ଭାରତର ଗୋଲ୍ ବର୍ଷା:
ଚତୁର୍ଥ ତଥା ଶେଷ କ୍ୱାର୍ଟରରେ ଭାରତୀୟ ଦଳ ଆକ୍ରମଣକୁ ଜୋରଦାର କରିଥିଲା। ୪୭ତମ ମିନିଟ୍ରେ ଅଧିନାୟକ ହରମନପ୍ରୀତ ସିଂହ ପେନାଲ୍ଟି କର୍ଣ୍ଣରରୁ ଗୋଲ୍ କରି ଭାରତକୁ ୨-୧ରେ ଆଗୁଆ କରିଥିଲେ। ଏହାର ଚାରି ମିନିଟ୍ ପରେ, ୫୧ତମ ମିନିଟ୍ରେ ଅଭିଷେକ ନୈନ ନିଜର ଦ୍ୱିତୀୟ ଗୋଲ୍ କରି ସ୍କୋରକୁ ୩-୧ କରିଥିଲେ। ମ୍ୟାଚ୍ର ୫୬ତମ ମିନିଟ୍ରେ ବିଷ୍ଣୁକାନ୍ତ ସିଂହ ହରମନପ୍ରୀତଙ୍କ ଚମତ୍କାର ଏରିଆଲ୍ ପାସ୍କୁ ଗୋଲ୍ରେ ପରିଣତ କରିଥିଲେ। ଫଳରେ ଭାରତ ୪-୧ ଗୋଲ୍ରେ ମ୍ୟାଚ୍ ଜିତିଥିଲା।
ରବିବାର ମାଲେସିଆ ସହ ମୁକାବିଲା:
ଏହି ଟୁର୍ଣ୍ଣାମେଣ୍ଟର ପ୍ରଥମ ମ୍ୟାଚ୍ରେ ଭାରତ ବାଂଲାଦେଶକୁ ୧୩-୦ ଗୋଲ୍ରେ ଏବଂ ଦ୍ୱିତୀୟ ମ୍ୟାଚ୍ରେ ଚୀନ୍କୁ ୫-୨ ଗୋଲ୍ରେ ହରାଇଥିଲା। ଏବେ କ୍ରମାଗତ ତିନିଟି ବିଜୟ ସହ ଦଳ ସେମିଫାଇନାଲରେ ପହଞ୍ଚିଛି। ଭାରତର ପରବର୍ତ୍ତୀ ମ୍ୟାଚ୍ ରବିବାର ମାଲେସିଆ ବିପକ୍ଷରେ ଖେଳାଯିବ। ଅନ୍ୟପଟେ ଜାପାନ ନିଜର ପରବର୍ତ୍ତୀ ମ୍ୟାଚ୍ରେ ଚୀନ୍କୁ ଭେଟିବ।
