OCA Elections: ଡିସେମ୍ବର ୨୪ ପରେ ହେବ ଓସିଏ ନିର୍ବାଚନ, ସ୍ୱତନ୍ତ୍ର ବୈଠକରେ ବଡ଼ ନିଷ୍ପତ୍ତି
ଓସିଏର ସ୍ୱତନ୍ତ୍ର ସାଧାରଣ ପରିଷଦ ବୈଠକରେ ଏହି ନିଷ୍ପତ୍ତି ସର୍ବସମ୍ମତିକ୍ରମେ ନିଆଯାଇଛି। ପ୍ରଥମେ ଡିସେମ୍ବର ୨୪ର ଅନ୍ତର୍ଜାତୀୟ ମ୍ୟାଚ୍କୁ ସଫଳତାର ସହ ଆୟୋଜନ କରିବା ଏବଂ ଏହାପରେ ନିର୍ବାଚନ ପ୍ରକ୍ରିୟା ଆରମ୍ଭ କରିବାକୁ ସଦସ୍ୟମାନେ ସହମତି ପ୍ରକାଶ କରିଛନ୍ତି।
କଟକ: ଓଡ଼ିଶା କ୍ରିକେଟ୍ ଆସୋସିଏସନ୍ (OCA)ର ବହୁ ପ୍ରତୀକ୍ଷିତ ନିର୍ବାଚନକୁ ନେଇ ଆସିଛି ବଡ଼ ଖବର। ଆସନ୍ତା ଡିସେମ୍ବର ୨୪ ତାରିଖରେ କଟକରେ ହେବାକୁ ଥିବା ଅନ୍ତର୍ଜାତୀୟ କ୍ରିକେଟ୍ ମ୍ୟାଚ୍ ଶେଷ ହେବା ପରେ ଓସିଏର ନିର୍ବାଚନ ଅନୁଷ୍ଠିତ ହେବ। ଏନେଇ ଓସିଏ ପକ୍ଷରୁ ଆନୁଷ୍ଠାନିକ ଭାବେ ଘୋଷଣା କରାଯାଇଛି।
ଓସିଏର ସ୍ୱତନ୍ତ୍ର ସାଧାରଣ ପରିଷଦ ବୈଠକରେ ଏହି ନିଷ୍ପତ୍ତି ସର୍ବସମ୍ମତିକ୍ରମେ ନିଆଯାଇଛି। ପ୍ରଥମେ ଡିସେମ୍ବର ୨୪ର ଅନ୍ତର୍ଜାତୀୟ ମ୍ୟାଚ୍କୁ ସଫଳତାର ସହ ଆୟୋଜନ କରିବା ଏବଂ ଏହାପରେ ନିର୍ବାଚନ ପ୍ରକ୍ରିୟା ଆରମ୍ଭ କରିବାକୁ ସଦସ୍ୟମାନେ ସହମତି ପ୍ରକାଶ କରିଛନ୍ତି।
ବର୍ତ୍ତମାନ ଓସିଏର ପ୍ରାଥମିକତା ହେଉଛି ଅନ୍ତର୍ଜାତୀୟ ମ୍ୟାଚ୍ର ସୁପରିଚାଳନା। ଏଥିପାଇଁ ଆବଶ୍ୟକ ଭିତ୍ତିଭୂମି ପ୍ରସ୍ତୁତି, ମ୍ୟାଚ୍ ଆୟୋଜନ ସମ୍ପର୍କିତ ବ୍ୟବସ୍ଥା ଏବଂ ସମସ୍ତ ନିୟମାବଳୀ ପାଳନ ଉପରେ ଗୁରୁତ୍ୱ ଦିଆଯାଉଛି। ଏହି କାରଣରୁ ନିର୍ବାଚନ ପ୍ରକ୍ରିୟାକୁ ମ୍ୟାଚ୍ ପର୍ଯ୍ୟନ୍ତ ସ୍ଥଗିତ ରଖିବାକୁ ସ୍ଥିର ହୋଇଛି।
ସୂଚନାଯୋଗ୍ୟ, ପୂର୍ବତନ ଅଫିସ୍ ବିଅରର୍ସଙ୍କ କାର୍ଯ୍ୟକାଳ ଶେଷ ହେବା ପରେ ଓସିଏର ନିର୍ବାଚନ ହେବା କଥା ଥିଲା। କିନ୍ତୁ ନିର୍ବାଚନ ବିଳମ୍ବକୁ ନେଇ ଏହା ପୂର୍ବରୁ ଓଡ଼ିଶା ହାଇକୋର୍ଟରେ ମାମଲା ମଧ୍ୟ ଦାୟର ହୋଇଥିଲା। ତେବେ ଅନ୍ତର୍ଜାତୀୟ ମ୍ୟାଚ୍ ଆୟୋଜନ ଏବଂ ପ୍ରଶାସନିକ କାର୍ଯ୍ୟରେ ନିରନ୍ତରତା ରକ୍ଷା କରିବା ପାଇଁ ନିର୍ବାଚନ ଘୁଞ୍ଚାଇବା ଆବଶ୍ୟକ ବୋଲି ଓସିଏ ପକ୍ଷରୁ ଯୁକ୍ତି ରଖାଯାଇଥିଲା।
ଏବେ ସାଧାରଣ ପରିଷଦର ସହମତି ପରେ ଡିସେମ୍ବର ୨୪ ମ୍ୟାଚ୍ ଶେଷ ହେବା ମାତ୍ରେ ନୂଆ କର୍ମକର୍ତ୍ତା ଚୟନ ପାଇଁ ନିର୍ବାଚନୀ ରୋଡମ୍ୟାପ୍ ଆରମ୍ଭ ହେବ। ତେବେ ନିର୍ବାଚନର ନିର୍ଦ୍ଦିଷ୍ଟ ତାରିଖ ଓ କାର୍ଯ୍ୟସୂଚୀ ପରବର୍ତ୍ତୀ ସମୟରେ ସ୍ପଷ୍ଟ ହେବ।
