Ajay Devgn News: ଅଜୟ ଦେବଗନଙ୍କୁ ଡବଲ୍ ଝଟକା!BMCର କାର୍ଯ୍ୟାନୁଷ୍ଠାନ, FDAର ନୋଟିସ୍‌

Ajay Devgn News: ବଲିଉଡ୍‌ର ଲୋକପ୍ରିୟ ଅଭିନେତା ଅଜୟ ଦେବଗନଙ୍କୁ ନେଇ ମୁମ୍ବାଇରୁ ଆସିଛି ଏକ ବଡ଼ ଖବର। ଜୁହୁସ୍ଥିତ ଏକ ବଙ୍ଗଳାରେ କଥିତ ବେଆଇନ ନିର୍ମାଣ ଅଭିଯୋଗରେ ବୃହନ୍‌ମୁମ୍ବାଇ ମହାନଗର ନିଗମ (BMC) ପକ୍ଷରୁ ଭଙ୍ଗାଭଙ୍ଗି କାର୍ଯ୍ୟାନୁଷ୍ଠାନ ହୋଇଥିବା ଖବର ସାମ୍ନାକୁ ଆସିଛି। ଅନ୍ୟପଟେ, ଏହି ଘଟଣାକୁ ନେଇ ଅଜୟ ଦେବଗନଙ୍କ ପିଆର୍‌ ଟିମ୍‌ ସ୍ପଷ୍ଟୀକରଣ ଦେଇଛି। ଏହା ସହିତ ‘ବିମଲ ଇଲାଇଚି’ ବିଜ୍ଞାପନକୁ ନେଇ ମଧ୍ୟ ଅଭିନେତା ଜଣକ ଚର୍ଚ୍ଚାରେ ଅଛନ୍ତି।

ବଙ୍ଗଳାର କିଛି ଅଂଶ ଭାଙ୍ଗିଲା BMC:
ରିପୋର୍ଟ ଅନୁଯାୟୀ, ମୁମ୍ବାଇର ଜୁହୁସ୍ଥିତ କାପୋଲ କୋ-ଅପରେଟିଭ୍ ହାଉସିଂ ସୋସାଇଟିରେ ଥିବା ପ୍ରାୟ ୭,୮୦୨ ବର୍ଗଫୁଟ ଅଞ୍ଚଳର ଏକ ବଙ୍ଗଳାର କିଛି ଅଂଶକୁ BMC ଭାଙ୍ଗିଦେଇଛି। ଅନୁମତି ନ ନେଇ ନିର୍ମାଣରେ ପରିବର୍ତ୍ତନ, ଘର ଭିତରେ ଅଲଗା ଅଂଶ ତିଆରି କରିବା ପାଇଁ କାନ୍ଥ ନିର୍ମାଣ ଏବଂ ଝରକା ଲଗାଇବା ଭଳି ଅନିୟମିତତା ହୋଇଥିବା ନେଇ ନଗର ନିଗମ ଅଭିଯୋଗ କରିଛି।

BMC says, "The Brihanmumbai Municipal Corporation (BMC) has taken action against alleged unauthorized construction at actor Ajay Devgn’s bungalow in Juhu. The municipal corporation has demolished certain portions of the bungalow. It is alleged that internal modifications, partition walls, the installation of windows, and other construction work were being carried out without obtaining the necessary permissions. On September 10, 2026, the BMC issued a notice under Section 354A of the Mumbai Municipal Corporation Act, directing that the work be stopped immediately and requiring the submission of necessary documents and permits. However, as the construction work continued despite the notice, the BMC demolished parts of the unauthorized structure." (File photo)

— ANI (@ANI) October 17, 2026

BMCର କହିବା ଅନୁସାରେ, ୧୦ ସେପ୍ଟେମ୍ବର ୨୦୨୬ରେ ମୁମ୍ବାଇ ମହାନଗର ନିଗମ ଆଇନର ଧାରା ୩୫୪ଏ ଅନୁଯାୟୀ ନୋଟିସ୍ ଜାରି କରାଯାଇଥିଲା। ନିର୍ମାଣ କାମ ତୁରନ୍ତ ବନ୍ଦ କରିବା ସହ ସମ୍ପୃକ୍ତ ଅନୁମତିପତ୍ର ଓ ଆବଶ୍ୟକ କାଗଜପତ୍ର ଦାଖଲ କରିବାକୁ କୁହାଯାଇଥିଲା। କିନ୍ତୁ ନୋଟିସ୍‌କୁ ଅଣଦେଖା କରି ନିର୍ମାଣ କାମ ଜାରି ରହିଥିବା ଅଭିଯୋଗ ପରେ ନଗର ନିଗମ ପକ୍ଷରୁ ଭଙ୍ଗାଭଙ୍ଗି କାର୍ଯ୍ୟାନୁଷ୍ଠାନ ନିଆଯାଇଥିବା କୁହାଯାଇଛି।

ଅଜୟ ଦେବଗନଙ୍କ ପିଆର୍‌ ଟିମ୍‌ର ସ୍ପଷ୍ଟୀକରଣ:
ଏହି ଘଟଣାକୁ ନେଇ ଅଜୟ ଦେବଗନଙ୍କ ପିଆର୍‌ ପ୍ରତିନିଧି ପରାଗ ଦେଶାଇ ପ୍ରତିକ୍ରିୟା ଦେଇଛନ୍ତି। ତାଙ୍କ କହିବା ଅନୁସାରେ, ଅଜୟ ଦେବଗନଙ୍କ ନିଜ ବାସଭବନରେ BMC କାର୍ଯ୍ୟାନୁଷ୍ଠାନ କରିଥିବା ଖବର ଭିତ୍ତିହୀନ। ଯେଉଁ ସମ୍ପତ୍ତିରେ କାର୍ଯ୍ୟାନୁଷ୍ଠାନ ହୋଇଛି, ତାହା ଅଜୟ ଦେବଗନଙ୍କର ହୋଇଥିଲେ ମଧ୍ୟ ତାଙ୍କ ନିଜ ଘରଠାରୁ ଦୂରରେ ଅବସ୍ଥିତ। ଏହି ବଙ୍ଗଳାକୁ ଭଡ଼ାରେ ଦିଆଯାଇଥିବା ସେ ସ୍ପଷ୍ଟ କରିଛନ୍ତି।

ସମ୍ପୃକ୍ତ ସମ୍ପତ୍ତିରେ କିଛି ଅନିୟମିତତା ଚିହ୍ନଟ ହେବା ପରେ କାର୍ଯ୍ୟାନୁଷ୍ଠାନ ହୋଇଥିବା ପିଆର୍‌ ଟିମ୍‌ ପକ୍ଷରୁ କୁହାଯାଇଛି। ତେଣୁ ଏହି ଘଟଣାକୁ ଅଜୟ ଦେବଗନଙ୍କ ନିଜ ବାସଭବନ ଉପରେ ହୋଇଥିବା କାର୍ଯ୍ୟାନୁଷ୍ଠାନ ଭାବେ ଦର୍ଶାଇବା ଠିକ୍‌ ନୁହେଁ ବୋଲି ତାଙ୍କ ପକ୍ଷରୁ ସ୍ପଷ୍ଟ କରାଯାଇଛି।

‘ବିମଲ ଇଲାଇଚି’ ବିଜ୍ଞାପନକୁ ନେଇ ମଧ୍ୟ ବିବାଦ:
ଏହା ବ୍ୟତୀତ ‘ବିମଲ ଇଲାଇଚି’ ବିଜ୍ଞାପନକୁ ନେଇ ମଧ୍ୟ ଅଜୟ ଦେବଗନ ଆଉ ଏକ ବିବାଦରେ ଛନ୍ଦି ହୋଇଛନ୍ତି। ମହାରାଷ୍ଟ୍ରର ଖାଦ୍ୟ ଓ ଔଷଧ ପ୍ରଶାସନ (FDA) ପକ୍ଷରୁ ଅଜୟ ଦେବଗନଙ୍କ ସମେତ ଶାହରୁଖ ଖାନ ଓ ଟାଇଗର ଶ୍ରଫ୍‌ଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଥିବା ରିପୋର୍ଟରେ ଉଲ୍ଲେଖ ରହିଛି।

ମହାରାଷ୍ଟ୍ର FDAର ମୁଖ୍ୟ ତୁକାରାମ ମୁଣ୍ଢେଙ୍କ ଅନୁଯାୟୀ, ଏହି ବିଜ୍ଞାପନ ଏକ ନିଷିଦ୍ଧ ଉତ୍ପାଦର ବିକଳ୍ପକୁ ପ୍ରଚାର କରୁଛି କି ନାହିଁ, ତାହାର ଯାଞ୍ଚ କରାଯାଉଛି। ଏଥିପାଇଁ ବିଜ୍ଞାପନରେ ଅଭିନୟ କରିଥିବା ତିନି ଅଭିନେତା ଏବଂ ସମ୍ପୃକ୍ତ କମ୍ପାନୀକୁ ଜବାବ ମଗାଯାଇଛି। ସେମାନଙ୍କ ଉତ୍ତର ଓ ଯାଞ୍ଚ ରିପୋର୍ଟ ଆଧାରରେ ପରବର୍ତ୍ତୀ ପଦକ୍ଷେପ ନିଆଯିବ।

‘ଦୃଶ୍ୟମ୍ ୩’ର ସଫଳତା ମଧ୍ୟରେ ଅଜୟ ଚର୍ଚ୍ଚାରେ:
ଅନ୍ୟପଟେ, ଅଜୟ ଦେବଗନଙ୍କ ଅଭିନୀତ କ୍ରାଇମ୍‌ ଥ୍ରିଲର୍‌ ଫ୍ରାଞ୍ଚାଇଜ୍‌ର ଶେଷ ଚଳଚ୍ଚିତ୍ର ‘ଦୃଶ୍ୟମ୍ ୩’କୁ ନେଇ ମଧ୍ୟ ଚର୍ଚ୍ଚା ଚାଲିଛି। ଉପଲବ୍ଧ ସୂଚନା ଅନୁଯାୟୀ, ଅଭିଷେକ ପାଠକଙ୍କ ନିର୍ଦ୍ଦେଶିତ ଏହି ଚଳଚ୍ଚିତ୍ର ୨ ଅକ୍ଟୋବର ୨୦୨୬ରେ ମୁକ୍ତିଲାଭ କରିଥିଲା ଏବଂ ବକ୍ସ ଅଫିସ୍‌ରେ ୪୦୦ କୋଟି ଟଙ୍କା ଆୟ କରିଥିବା ଦାବି କରାଯାଇଛି।

ଅଜୟ ଦେବଗନଙ୍କ ଅଭିନୟ, ରୋମାଞ୍ଚକର କାହାଣୀ ଓ ଅପ୍ରତ୍ୟାଶିତ ମୋଡ଼କୁ ନେଇ ଦର୍ଶକ ଓ ସମୀକ୍ଷକଙ୍କ ମଧ୍ୟରେ ଚର୍ଚ୍ଚା ହୋଇଥିବା କୁହାଯାଉଛି।