Florida Plane Crash: ଫ୍ଲୋରିଡାରେ ବିଜନେସ ଜେଟ୍ କ୍ରାସ୍, ୯ ଜଣଙ୍କ ମୃତ୍ୟୁ

Florida Plane Crash: ଫ୍ଲୋରିଡାରେ ଏକ ବିମାନ ଦୁର୍ଘଟଣା ଘଟିଛି ଫଳରେ ସେଥିରେ ଥିବା ସମସ୍ତ ୯ ଜଣଙ୍କର ମୃତ୍ୟୁ ଘଟିଛି। ପ୍ରାଥମିକ ସୂଚନା ଅନୁଯାୟୀ, ବିମାନଟି ହଠାତ୍ ଅତି ଦ୍ରୁତ ଗତିରେ ତଳକୁ ଖସିଆସିଥିଲା ଏବଂ ଏକ ଆବାସିକ ଅଞ୍ଚଳର ରାସ୍ତା କଡ଼ରେ କ୍ରାସ୍ ହୋଇ ନିଆଁ ପିଣ୍ଡୁଳାରେ ପରିଣତ ହୋଇଯାଇଥିଲା। ଆମେରିକାର ପରିବହନ ସଚିବ ସନ୍ ଡଫି ଏହି ଦୁର୍ଘଟଣାକୁ ନିଶ୍ଚିତ କରିଛନ୍ତି।

ପରିବହନ ସଚିବ ସନ୍ ଡଫି ଜଣାଇଛନ୍ତି ଯେ, ରବିବାର ମଧ୍ୟାହ୍ନ ପ୍ରାୟ ୧୨:୫୦ ରେ (ଇଟି) ଫ୍ଲୋରିଡାର କ୍ରେଷ୍ଟହେଭେନ୍ ନିକଟସ୍ଥ ଏକ ଆବାସିକ ଅଞ୍ଚଳରେ 'ଲିୟରଜେଟ୍ ୬୦' (Learjet 60) ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା। ଡଫିଙ୍କ କହିବା ଅନୁଯାୟୀ, ଏହି ବିମାନଟି ଟେକ୍ସାସର ଅଷ୍ଟିନରୁ ଉଡ଼ାଣ ଭରି ବାହାମାସ୍ ଅଭିମୁଖେ ଯାଉଥିବା ବେଳେ ବାଟରେ ଦୁର୍ଘଟଣାର ଶିକାର ହୋଇଥିଲା। ସେ ଏହି ମର୍ମନ୍ତୁଦ ଘଟଣା ପାଇଁ ଗଭୀର ଦୁଃଖ ପ୍ରକାଶ କରିବା ସହ ସମସ୍ତ ମୃତକଙ୍କ ପ୍ରତି ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି।

ନ୍ୟାସନାଲ ଟ୍ରାନ୍ସପୋର୍ଟେସନ ସେଫ୍ଟି ବୋର୍ଡ (NTSB) ଏହି ବିମାନ ଦୁର୍ଘଟଣାର ତଦନ୍ତ କରିବ । ସେମାନଙ୍କ ସହାୟତା ପାଇଁ ଫେଡେରାଲ ଆଭିଏସନ ଆଡମିନିଷ୍ଟ୍ରେସନ (FAA) ର ଏକ ପ୍ରତିନିଧି ଦଳକୁ ଘଟଣାସ୍ଥଳକୁ ପଠାଯାଇଛି। ଆମେରିକୀୟ ନ୍ୟୁଜ୍ ଚ୍ୟାନେଲଗୁଡ଼ିକ ଅନୁଯାୟୀ, ବିମାନଟି ହଠାତ୍ ଅତି ତୀବ୍ର ଗତିରେ ତଳକୁ ଖସି ଆସିଥିଲା ଏବଂ ଜନବସତି ଅଞ୍ଚଳର ଏକ ରାସ୍ତା କଡ଼ରେ ପିଟି ହୋଇ ଭୟଙ୍କର ଭାବେ ଜଳିଉଠିଥିଲା। ଧକ୍କା ଏତେ ଜୋରଦାର ଥିଲା ଯେ ରାସ୍ତାରେ ଏକ ବଡ଼ ଗାତ ସୃଷ୍ଟି ହୋଇଯାଇଥିଲା ଏବଂ ଚାରିଆଡ଼େ ନିଆଁ ବ୍ୟାପି ଯାଇଥିଲା। ଏହି ଦୁର୍ଘଟଣା ସହ ଜଡ଼ିତ ଏକ ଭିଡିଓ ସୋସିଆଲ ମିଡିଆରେ ଖୁବ୍ ଦ୍ରୁତ ଗତିରେ ଭାଇରାଲ ହେବାରେ ଲାଗିଛି।

ଭିଡିଓରେ ସ୍ପଷ୍ଟ ଦେଖାଯାଉଛି ଯେ, ବିମାନଟି ଅତି ଦ୍ରୁତ ଗତିରେ ତଳକୁ ଆସୁଛି ଏବଂ ରାସ୍ତା ଉପରେ ଏକ ମିସାଇଲ୍ ଭଳି ଆସି ତଳେ ପିଟି ହେଉଛି। ରାସ୍ତାରେ ପିଟି ହେବା ମାତ୍ରେ ହିଁ ସେଠାରେ ଏକ ବିଶାଳ ନିଆଁର ଗୋଲା ଉଠୁଛି। ବିମାନଟି ଖସିପଡ଼ିବା ଯୋଗୁଁ ପିଚୁ ରାସ୍ତାରେ ଏକ ବହୁତ ବଡ଼ ଗାତ ତିଆରି ହୋଇଯାଇଛି। ଚାରିଆଡ଼େ ଭୟରେ ଚିତ୍କାର କରି ଲୋକମାନେ ଏପଟେ ସେପଟେ ଦୌଡ଼ୁଥିବାର ଦୃଶ୍ୟ ଭିଡିଓରେ ନଜର ଆସୁଛି। ଗଣମାଧ୍ୟମର ରିପୋର୍ଟ ଅନୁଯାୟୀ, ଏହି ବିମାନଟି ଆବାସିକ ଘରଗୁଡ଼ିକଠାରୁ ମାତ୍ର କିଛି ମିଟର ଦୂରରେ ଖସିପଡ଼ିଥିଲା। ଅଷ୍ଟିନ-ବର୍ଗଷ୍ଟ୍ରମ ଆନ୍ତର୍ଜାତୀୟ ବିମାନବନ୍ଦରର ମୁଖପାତ୍ର ଜିମ୍ ରେନଲ୍ଡସ ଏହି ଦୁର୍ଘଟଣାକୁ ଏକ ଅତି ବଡ଼ ଦୁଃଖଦାୟକ ଘଟଣା ବୋଲି କହିଛନ୍ତି।

Also Read- Cyclone Alert: ଭୀଷଣ ବାତ୍ୟାରେ ପରିଣତ ହେଲା ‘ମୁରାସୁ’, ଏହି ଜିଲ୍ଲାକୁ ୱାର୍ଣ୍ଣିଂ...