Chhath Puja 2026: ସୁନସରୀ ଜିଲ୍ଲାର ଘୁସ୍କୀ ଅଞ୍ଚଳର ହରି ନଗର ଗାଁ-୬ରେ କିଛି ଅଜଣା ବ୍ୟକ୍ତି ନଦୀ କୂଳରେ ନିର୍ମିତ ଛଠ୍ ଘାଟରେ ଭଙ୍ଗାରୁଜା କରିଥିଲେ। ଏହାକୁ ନେଇ ସ୍ଥାନୀୟ ଲୋକେ ଉତ୍ତ୍ୟକ୍ତ ହୋଇପଡ଼ିଥିଲେ। ଏଭଳି କାଣ୍ଡ ପଛରେ କିଛି ମୁସଲିମ୍ ସମ୍ପ୍ରଦାୟର ଲୋକଙ୍କ ହାତ ରହିଥାଇପାରେ ବୋଲି ସ୍ଥାନୀୟ ଲୋକେ ଅଭିଯୋଗ ଆଣିଛନ୍ତି। ହିନ୍ଦୁ ସମାଜର ନେତାମାନେ ଏହି ଘଟଣାକୁ ଧାର୍ମିକ ବିଶ୍ୱାସ ଉପରେ ଆକ୍ରମଣ ବୋଲି କହିବା ସହ ପୋଲିସ ନିକଟରେ କଡ଼ା କାର୍ଯ୍ୟାନୁଷ୍ଠାନ ଦାବି କରିଛନ୍ତି।
ଉତ୍ତେଜନା ବଢ଼ୁଥିବା ଦେଖି ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା । ଘଟଣାରେ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି। ଗିରଫ ହୋଇଥିବା ଦୁଇ ଅଭିଯୁକ୍ତ ମୁସଲିମ ସମ୍ପ୍ରଦାୟର ବୋଲି ସୂଚନା ମିଳିଛି। ଘଟଣା ପରେ ସମ୍ଭାବ୍ୟ ଉତ୍ତେଜନାକୁ ଦୃଷ୍ଟିରେ ରଖି ଅଞ୍ଚଳରେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି। କେବଳ ସେତିକି ନୁହେଁ, ପ୍ରଶାସନ ପକ୍ଷରୁ କ୍ଷତିଗ୍ରସ୍ତ ପୂଜା ସ୍ଥଳର ତୁରନ୍ତ ମରାମତି କରାଯାଇ ତାହାକୁ ପୁଣିଥରେ ଠିକ୍ କରିଦିଆଯାଇଛି। ପ୍ରଶାସନର ଏହି ପଦକ୍ଷେପ କାରଣରୁ ଏବେ ଲୋକମାନେ ଉଦୀୟମାନ ସୂର୍ଯ୍ୟଙ୍କୁ ଅର୍ଘ୍ୟ ଦେଇ ନିଜର ଛଠ୍ ବ୍ରତ ଶେଷ କରିପାରିବେ।
ଛଠ୍ ପୂଜା କେବଳ ବିହାରର ଏକ ଧାର୍ମିକ ଉତ୍ସବ ନୁହେଁ। ସୀମାର ବନ୍ଧନକୁ ଅତିକ୍ରମ କରି ଏହି ମହାପର୍ବ ବିଶ୍ୱର ଅନେକ ଦେଶରେ ପାଳନ କରାଯାଏ। ନେପାଳରେ ମଧ୍ୟ ଛଠ୍ ମହାପର୍ବ ପୂରା ଉତ୍ସାହ ଓ ଉଦ୍ଦୀପନାର ସହ ପାଳନ କରାଯାଇଥାଏ। ଛଠ୍ ପୂଜା ନେପାଳର ତରାଇ-ମଧେଶ ଅଞ୍ଚଳର ପ୍ରମୁଖ ପର୍ବମାନଙ୍କ ମଧ୍ୟରୁ ଅନ୍ୟତମ। ଏବେ ଏହା କାଠମାଣ୍ଡୁ ଉପତ୍ୟକା ଏବଂ ଦେଶର ଅନ୍ୟାନ୍ୟ ଅଞ୍ଚଳରେ ମଧ୍ୟ ଲୋକପ୍ରିୟ ହେବାରେ ଲାଗିଛି। ରବିବାର ଅସ୍ତଗାମୀ ସୂର୍ଯ୍ୟଙ୍କୁ ଅର୍ଘ୍ୟ ଦେବା ସମୟରେ ନେପାଳର ମେଚୀ ନଦୀ କୂଳ ଦୁଇ ଦେଶର ଆସ୍ଥା ଓ ସାଂସ୍କୃତିକ ପରମ୍ପରାର ମିଳନ ସ୍ଥଳ ପାଲଟିଥିଲା। ଏଠାରେ ବହୁ ସଂଖ୍ୟାରେ ଏକାଠି ହୋଇଥିବା ଶ୍ରଦ୍ଧାଳୁମାନେ ଅସ୍ତଗାମୀ ସୂର୍ଯ୍ୟଙ୍କୁ ଅର୍ଘ୍ୟ ଦେଇଥିଲେ । ଆଜି ଉଦୀୟମାନ ସୂର୍ଯ୍ୟଙ୍କୁ ଅର୍ଘ୍ୟ ଦେବା ପାଇଁ ଲୋକେ ବିଳମ୍ବିତ ରାତିରୁ ହିଁ ଘାଟରେ ପହଞ୍ଚି ଯାଇଥିଲେ।