Delhi Air Pollution Crisis: ଦୀପାବଳି ପରେ ଦିଲ୍ଲୀରେ ପ୍ରଦୂଷଣ ବିସ୍ଫୋରଣ! ନିଶ୍ୱାସ ନେବା ବି ହେଲା କଷ୍ଟକର

Delhi Air Pollution Crisis: ଦୀପାବଳି ପରେ ଦିଲ୍ଲୀରେ ବାୟୁ ପ୍ରଦୂଷଣକୁ ନେଇ ବଢ଼ିଛି ଚିନ୍ତା। ବାଣ ଫୁଟାଇବା ଓ ପାଣିପାଗର ପରିବର୍ତ୍ତନ ମଧ୍ୟରେ ରାଜଧାନୀର ବାୟୁମଣ୍ଡଳ ଅତ୍ୟନ୍ତ ପ୍ରଦୂଷିତ ହୋଇପଡ଼ିଛି। କେତେକ ଅନୌପଚାରିକ ରିପୋର୍ଟରେ AQI ୮୨୫ରୁ ଅଧିକ ହୋଇଥିବା ଦାବିକୁ ନେଇ ଆତଙ୍କ ସୃଷ୍ଟି ହୋଇଛି। ସକାଳୁ ସକାଳୁ ଦିଲ୍ଲୀର ଅନେକ ଅଞ୍ଚଳ ଘନ ଧୂଆଁ ଓ କୁହୁଡ଼ିର ଚାଦରରେ ଢାଙ୍କି ହୋଇ ରହିଥିବାରୁ ରାସ୍ତାଘାଟରେ ଯାତାୟାତ ମଧ୍ୟ ପ୍ରଭାବିତ ହୋଇଛି।

ରାଜଧାନୀର ଇନ୍ଦ୍ରଲୋକ, ଆଇଟିଓ, ସୋନିଆ ବିହାର ଓ ଅନ୍ୟାନ୍ୟ ପ୍ରମୁଖ ଅଞ୍ଚଳରେ ବାୟୁର ମାନ ଅତ୍ୟନ୍ତ ଖରାପ ରହିଥିବା ରିପୋର୍ଟ ଆସିଛି। ଘନ ସ୍ମଗ୍‌ ଯୋଗୁଁ ସକାଳ ସମୟରେ ଦୃଶ୍ୟମାନତା ହ୍ରାସ ପାଇଛି। ଫଳରେ ଗାଡ଼ି ଚାଳକ ଓ ରାସ୍ତାରେ ଯାତାୟାତ କରୁଥିବା ଲୋକେ ଅସୁବିଧାର ସାମ୍ନା କରୁଛନ୍ତି।

ସୋନିଆ ବିହାରରେ ସବୁଠାରୁ ଖରାପ ସ୍ଥିତି:
ଦିଆଯାଇଥିବା ରିପୋର୍ଟ ଅନୁସାରେ, ଦିଲ୍ଲୀର ୫୯ଟି ବାୟୁ ଗୁଣବତ୍ତା ମନିଟରିଂ ଷ୍ଟେସନ୍‌ ମଧ୍ୟରୁ ୨୦ଟି ଷ୍ଟେସନ୍‌ରେ ବାୟୁର ମାନ ଗମ୍ଭୀର ଶ୍ରେଣୀରେ ରହିଥିଲା। ୩୩ଟି ଷ୍ଟେସନ୍‌ରେ ଅତ୍ୟନ୍ତ ଖରାପ ଏବଂ ୬ଟି ଷ୍ଟେସନ୍‌ରେ ଖରାପ ଶ୍ରେଣୀର ପ୍ରଦୂଷଣ ରେକର୍ଡ ହୋଇଥିଲା। ସୋନିଆ ବିହାରରେ AQI ୪୬୩ ରେକର୍ଡ ହୋଇଥିବା ରିପୋର୍ଟରେ ଉଲ୍ଲେଖ ରହିଛି।

ଆଗକୁ ଆହୁରି ବିଗିଡ଼ିପାରେ ପରିସ୍ଥିତି:
ପାଣିପାଗରେ ପରିବର୍ତ୍ତନ ଓ ପବନର ବେଗ କମ୍ ରହିବା ଯୋଗୁଁ ଆଗାମୀ କିଛି ଦିନ ଦିଲ୍ଲୀର ବାୟୁ ପ୍ରଦୂଷଣ ଗମ୍ଭୀର ସ୍ଥିତିରେ ରହିପାରେ ବୋଲି ଆଶଙ୍କା କରାଯାଉଛି। ଏଭଳି ପ୍ରଦୂଷିତ ବାୟୁ ସୁସ୍ଥ ଲୋକଙ୍କ ଫୁସ୍‌ଫୁସ୍‌ ଉପରେ ମଧ୍ୟ କୁପ୍ରଭାବ ପକାଇପାରେ। ବିଶେଷକରି ଶିଶୁ, ବୟସ୍କ ଓ ଶ୍ୱାସଜନିତ ସମସ୍ୟା ଥିବା ଲୋକଙ୍କ ପାଇଁ ଏହା ଅଧିକ ବିପଦଜନକ।

ଏଭଳି ପରିସ୍ଥିତିରେ ଲୋକଙ୍କୁ ଅତ୍ୟାବଶ୍ୟକ ନଥିଲେ ବାହାରକୁ ନଯିବା, ମାସ୍କ ବ୍ୟବହାର କରିବା ଏବଂ ବାହାରେ ବ୍ୟାୟାମ ନକରିବାକୁ ପରାମର୍ଶ ଦିଆଯାଉଛି।

ପ୍ରଦୂଷଣକୁ ନେଇ ରାଜନୀତି ତେଜ:
ଦିଲ୍ଲୀରେ ବାୟୁ ପ୍ରଦୂଷଣକୁ ନେଇ ରାଜନୈତିକ ବୟାନବାଜି ମଧ୍ୟ ଆରମ୍ଭ ହୋଇଛି। ଦିଲ୍ଲୀର ମନ୍ତ୍ରୀ କପିଲ ମିଶ୍ର ଆମ୍ ଆଦମୀ ପାର୍ଟିର ଜାତୀୟ ଆବାହକ ଅରବିନ୍ଦ କେଜ୍ରିୱାଲଙ୍କୁ ଟାର୍ଗେଟ୍ କରିଛନ୍ତି। ଦୀପାବଳି ଓ ସନାତନ ଧର୍ମକୁ ଟାର୍ଗେଟ୍ କରିବା ପାଇଁ ପ୍ରଦୂଷଣ ପ୍ରସଙ୍ଗକୁ ବ୍ୟବହାର କରାଯାଉଥିବା ସେ ଅଭିଯୋଗ କରିଛନ୍ତି। ସୋସିଆଲ ମିଡିଆ ପ୍ଲାଟଫର୍ମ Xରେ ପୋଷ୍ଟ କରି ସେ ଏଭଳି ଦାବି କରିଛନ୍ତି।

ତେବେ ରାଜନୈତିକ ଆରୋପ-ପ୍ରତ୍ୟାରୋପ ମଧ୍ୟରେ ଦିଲ୍ଲୀବାସୀଙ୍କ ପାଇଁ ବାୟୁ ପ୍ରଦୂଷଣ ଏବେ ସବୁଠାରୁ ବଡ଼ ଚିନ୍ତାର କାରଣ ପାଲଟିଛି।