‘ମୋଦୀ ଜୀ, ଦେଶର ଟାଙ୍କିରେ କ’ଣ ଭରାଯାଉଛି?’ E20 ପେଟ୍ରୋଲକୁ ନେଇ ରାହୁଲ ଗାନ୍ଧୀଙ୍କ ପ୍ରଶ୍ନ

E20 ପେଟ୍ରୋଲରେ ନିର୍ଦ୍ଧାରିତ ସୀମାଠାରୁ ଅଧିକ ଇଥାନଲ୍ ମିଶାଯାଉଥିବା ଅଭିଯୋଗକୁ ନେଇ ଦେଶରେ ନୂଆ ବିବାଦ ଆରମ୍ଭ ହୋଇଛି। କର୍ଣ୍ଣାଟକରେ ସଂଗ୍ରହ କରାଯାଇଥିବା ପେଟ୍ରୋଲ ନମୁନାର ଲାବରେଟୋରୀ ପରୀକ୍ଷା ରିପୋର୍ଟକୁ ଆଧାର କରି କେନ୍ଦ୍ର ସରକାରଙ୍କୁ ଘେରିଛନ୍ତି ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀ। ପେଟ୍ରୋଲରେ ପ୍ରକୃତରେ କେତେ ପ୍ରତିଶତ ଇଥାନଲ୍ ମିଶୁଛି, ସେନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସ୍ପଷ୍ଟୀକରଣ ଦିଅନ୍ତୁ ବୋଲି ସେ ଦାବି କରିଛନ୍ତି।

୧୪ଟି ନମୁନାରୁ ୧୧ଟିରେ ଅଧିକ ଇଥାନଲ୍ ଥିବା ଦାବି:
ରାହୁଲ ଗାନ୍ଧୀ ଶନିବାର ସୋସିଆଲ୍ ମିଡିଆ ପ୍ଲାଟଫର୍ମ ‘ଏକ୍ସ’ରେ ଏକ ପୋଷ୍ଟ କରି କର୍ଣ୍ଣାଟକ ସରକାରଙ୍କ ପକ୍ଷରୁ ସାତଟି ଜିଲ୍ଲାରୁ ସଂଗ୍ରହ ହୋଇଥିବା ପେଟ୍ରୋଲ ନମୁନାର ପରୀକ୍ଷା ରିପୋର୍ଟ ଉଲ୍ଲେଖ କରିଛନ୍ତି। ତାଙ୍କ ଦାବି ଅନୁସାରେ, ମୋଟ ୧୪ଟି ନମୁନା ମଧ୍ୟରୁ ୧୧ଟିରେ ଇଥାନଲ୍‌ର ପରିମାଣ E20 ମାନକରେ ଧାର୍ଯ୍ୟ ୨୦ ପ୍ରତିଶତ ସୀମାଠାରୁ ଅଧିକ ରହିଛି।

ରାହୁଲଙ୍କ ଉଲ୍ଲେଖ ଅନୁସାରେ, ଇଣ୍ଡିଆନ୍ ଅଏଲ୍ କର୍ପୋରେସନ୍ (IOCL)ର ଗୋଟିଏ ନମୁନାରେ ୩୧.୨ ପ୍ରତିଶତ ଏବଂ ହିନ୍ଦୁସ୍ତାନ ପେଟ୍ରୋଲିୟମ୍ କର୍ପୋରେସନ୍ (HPCL)ର ନମୁନାରେ ୩୦.୫ ପ୍ରତିଶତ ଇଥାନଲ୍ ମିଳିଥିବା ଦାବି କରାଯାଇଛି। ଏହାବ୍ୟତୀତ BPCL, ନାୟରା ଓ ସେଲ୍ ଭଳି ତୈଳ କମ୍ପାନୀଙ୍କ ନମୁନାରେ ମଧ୍ୟ ଧାର୍ଯ୍ୟ ସୀମାଠାରୁ ଅଧିକ ଇଥାନଲ୍ ଥିବା ସେ କହିଛନ୍ତି।

ଗାଡ଼ିର ମାଇଲେଜ୍ ଓ ରକ୍ଷଣାବେକ୍ଷଣ ଖର୍ଚ୍ଚକୁ ନେଇ ଚିନ୍ତା:
ରାହୁଲ ଗାନ୍ଧୀଙ୍କ କହିବା ଅନୁସାରେ, ପେଟ୍ରୋଲରେ ଅଧିକ ପରିମାଣର ଇଥାନଲ୍ ମିଶିଲେ ଗାଡ଼ିର କାର୍ଯ୍ୟକ୍ଷମତା ଉପରେ ପ୍ରଭାବ ପଡ଼ିପାରେ। ଏହାଦ୍ୱାରା ମାଇଲେଜ୍ କମିବା ସହ ଗାଡ଼ିର ମରାମତି ଓ ରକ୍ଷଣାବେକ୍ଷଣ ଖର୍ଚ୍ଚ ବଢ଼ିପାରେ ବୋଲି ସେ ଆଶଙ୍କା ପ୍ରକାଶ କରିଛନ୍ତି।

E20 बना 420 - जनता की गाड़ी से पेट्रोल चोरी! मोदी सरकार कहती है - पेट्रोल में 20% एथेनॉल है। कर्नाटक सरकार ने 7 ज़िलों से पेट्रोल के सैंपल लेकर मान्यता प्राप्त लैब में जाँच करवाई। नतीजा देखिए - 14 में से 11 सैंपल में 20% से ज़्यादा एथेनॉल - IOCL में 31.2%, HPCL में 30.5% - IOCL, HPCL, BPCL, Nayara, Shell - सरकारी हों या प्राइवेट - सब सीमा से ऊपर - और कंपनियों की अपनी लैब ने एथेनॉल की मात्रा रिपोर्ट में लिखी ही नहीं मतलब आप पैसा महंगे पेट्रोल का दे रहे हैं, टंकी में एथेनॉल भरा जा रहा है। नुकसान किसका? आपका। आपकी गाड़ी इतना एथेनॉल पचाने के लिए बनी ही नहीं - मतलब, घटता माइलेज, बार-बार मैकेनिक। शौक से ली गई गाड़ी की बर्बादी। और पंप पर लिखा तक नहीं कि टंकी में क्या डाला जा रहा है - चुनने का कोई विकल्प नहीं। मोदी जी, बताइए - देश की टंकी में क्या भरा जा रहा है? पेट्रोल में असल में कितना एथेनॉल है? 20% से ज़्यादा मिलावट करने वाली कंपनियों पर कार्रवाई कब होगी? और डिबेट की चुनौती अब भी खड़ी है। ये मुद्दा भी जोड़ लेंगे - आपकी नीतियों से असल में फ़ायदा किसे हो रहा है?

— Rahul Gandhi (@RahulGandhi) November 7, 2026

ପେଟ୍ରୋଲ ପମ୍ପରେ ଗ୍ରାହକଙ୍କୁ ଇନ୍ଧନରେ ପ୍ରକୃତରେ କେତେ ପ୍ରତିଶତ ଇଥାନଲ୍ ମିଶିଛି, ସେ ସମ୍ପର୍କରେ କାହିଁକି ସ୍ପଷ୍ଟ ସୂଚନା ଦିଆଯାଉନାହିଁ ବୋଲି ମଧ୍ୟ ସେ ପ୍ରଶ୍ନ ଉଠାଇଛନ୍ତି।

ପ୍ରଧାନମନ୍ତ୍ରୀ ମୋଦୀଙ୍କୁ ସିଧାସଳଖ ପ୍ରଶ୍ନ କରି ରାହୁଲ ଲେଖିଛନ୍ତି, “ମୋଦୀ ଜୀ, କୁହନ୍ତୁ—ଦେଶର ଟାଙ୍କିରେ କ’ଣ ଭରାଯାଉଛି? ପେଟ୍ରୋଲରେ ପ୍ରକୃତରେ କେତେ ଇଥାନଲ୍ ରହିଛି? ୨୦ ପ୍ରତିଶତରୁ ଅଧିକ ମିଶାଉଥିବା କମ୍ପାନୀଙ୍କ ବିରୋଧରେ କେବେ କାର୍ଯ୍ୟାନୁଷ୍ଠାନ ହେବ?”

ତୈଳ କମ୍ପାନୀଙ୍କ ପାଲଟା ଜବାବ:
ଅନ୍ୟପଟେ, ତିନିଟି ପ୍ରମୁଖ ସରକାରୀ ତୈଳ କମ୍ପାନୀ IOCL, BPCL ଓ HPCL କର୍ଣ୍ଣାଟକ ସରକାରଙ୍କ ପରୀକ୍ଷା ରିପୋର୍ଟ ଉପରେ ପ୍ରଶ୍ନ ଉଠାଇଛନ୍ତି। ଏକ ମିଳିତ ବିବୃତିରେ କମ୍ପାନୀଗୁଡ଼ିକ କହିଛନ୍ତି ଯେ, ସେମାନଙ୍କ ଦ୍ୱାରା ଯୋଗାଣ କରାଯାଉଥିବା E20 ପେଟ୍ରୋଲ୍ ଭାରତୀୟ ମାନକ ବ୍ୟୁରୋ (BIS)ର IS 17021 ମାନଦଣ୍ଡ ଅନୁସାରେ ରହିଛି।

ଅକ୍ଟୋବର ୨୦୨୬ରେ କର୍ଣ୍ଣାଟକରେ ହୋଇଥିବା ନମୁନା ସଂଗ୍ରହ ଓ ପରୀକ୍ଷା ପ୍ରକ୍ରିୟା ଉପରେ ମଧ୍ୟ କମ୍ପାନୀଗୁଡ଼ିକ ଆପତ୍ତି ଉଠାଇଛନ୍ତି। ସେମାନଙ୍କ ମତରେ, ଇନ୍ଧନର ନମୁନା ସଂଗ୍ରହ, ସଂରକ୍ଷଣ ଓ ପରୀକ୍ଷା ପାଇଁ ନିର୍ଦ୍ଦିଷ୍ଟ ନିୟମ ଓ ପ୍ରୋଟୋକଲ୍ ରହିଛି। ଏହି ନିୟମ ଅନୁସରଣ ହୋଇଛି କି ନାହିଁ, ତାହା ନେଇ ସେମାନେ ସନ୍ଦେହ ପ୍ରକାଶ କରିଛନ୍ତି।

କମ୍ପାନୀଗୁଡ଼ିକ କର୍ଣ୍ଣାଟକ ସରକାରଙ୍କୁ ପ୍ରତ୍ୟେକ ପେଟ୍ରୋଲ ପମ୍ପର ପରୀକ୍ଷା ରିପୋର୍ଟ, ନମୁନା ସଂଗ୍ରହର ରେକର୍ଡ ଏବଂ ପରୀକ୍ଷା ପଦ୍ଧତିର ସମ୍ପୂର୍ଣ୍ଣ ବିବରଣୀ ଦେବାକୁ କହିଛନ୍ତି। ଏହା ସହ ସଂରକ୍ଷିତ ନମୁନାଗୁଡ଼ିକୁ ଏକ ସ୍ୱୀକୃତିପ୍ରାପ୍ତ ଲାବରେଟୋରୀରେ ସ୍ୱାଧୀନ ଭାବେ ପୁନଃପରୀକ୍ଷା କରିବାକୁ ଦାବି କରିଛନ୍ତି।

କମ୍ପାନୀଗୁଡ଼ିକ ଆହୁରି କହିଛନ୍ତି ଯେ, ୨୭ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରୁ ପରୀକ୍ଷା କରାଯାଇଥିବା ୮୯୩ଟି ନମୁନା ନିର୍ଦ୍ଧାରିତ ସୀମା ମଧ୍ୟରେ ଥିଲା। କର୍ଣ୍ଣାଟକରୁ ପରୀକ୍ଷା ହୋଇଥିବା ୫୬ଟି ନମୁନାରେ ମଧ୍ୟ ଇଥାନଲ୍ ପରିମାଣ ୧୯ରୁ ୨୦ ପ୍ରତିଶତ ମଧ୍ୟରେ ଥିବା ସେମାନେ ଦାବି କରିଛନ୍ତି।

ତଦନ୍ତ ଦାବି କଲେ କର୍ଣ୍ଣାଟକ ମନ୍ତ୍ରୀ:
ଏହି ବିବାଦକୁ ନେଇ କର୍ଣ୍ଣାଟକର ମନ୍ତ୍ରୀ ଜି. ପରମେଶ୍ୱର ମଧ୍ୟ ଚିନ୍ତା ପ୍ରକାଶ କରିଛନ୍ତି। ଗ୍ରାହକଙ୍କ ସୁରକ୍ଷା ପାଇଁ କିଏ ଦାୟୀ ବୋଲି ପ୍ରଶ୍ନ କରିବା ସହ କଥିତ ଅନିୟମିତତାର ତଦନ୍ତ ଦାବି କରିଛନ୍ତି। ଗାଡ଼ିର ସୁରକ୍ଷା, ଇନ୍ଧନର ଦକ୍ଷତା ଓ ଗ୍ରାହକଙ୍କ ଅଧିକାର ସମ୍ପର୍କରେ ପ୍ରଧାନମନ୍ତ୍ରୀ ମୋଦୀ ଏବଂ କେନ୍ଦ୍ରମନ୍ତ୍ରୀ ନିତିନ ଗଡ଼କରୀଙ୍କଠାରୁ ମଧ୍ୟ ଜବାବ ମାଗିଛନ୍ତି।

E20 ପେଟ୍ରୋଲରେ ଇଥାନଲ୍ ମିଶ୍ରଣର ମାନଦଣ୍ଡ, ପରୀକ୍ଷା ପଦ୍ଧତି ଓ ଗ୍ରାହକଙ୍କ ସ୍ୱାର୍ଥକୁ ନେଇ ଏବେ ରାଜନୈତିକ ଓ ପ୍ରଶାସନିକ ସ୍ତରରେ ତର୍କ ତୀବ୍ର ହୋଇଛି। ତେବେ କର୍ଣ୍ଣାଟକ ସରକାରଙ୍କ ପରୀକ୍ଷା ରିପୋର୍ଟ ଓ ତୈଳ କମ୍ପାନୀଙ୍କ ପାଲଟା ଦାବି ମଧ୍ୟରେ ଚୂଡ଼ାନ୍ତ ସତ୍ୟ ଜାଣିବା ପାଇଁ ସ୍ୱଚ୍ଛ ଓ ସ୍ୱାଧୀନ ପୁନଃପରୀକ୍ଷା ଗୁରୁତ୍ୱପୂର୍ଣ୍ଣ ହୋଇପଡ଼ିଛି।