Diwali 2026: ଏଥର ମଧ୍ୟ ବୀର ଯବାନଙ୍କ ସହ ପାଳିବେ ଦୀପାବଳି, ଦେଶବାସୀଙ୍କୁ ଶୁଭେଚ୍ଛା ଜଣାଇଲେ ମୋଦୀ

ନୂଆଦିଲ୍ଲୀ: ଆଲୋକର ପର୍ବ ଦୀପାବଳି ଅବସରରେ ଦେଶବାସୀଙ୍କୁ ଶୁଭେଚ୍ଛା ଜଣାଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ପୂର୍ବ ବର୍ଷଗୁଡ଼ିକ ଭଳି ଏଥର ମଧ୍ୟ ଦେଶର ବୀର ଯବାନଙ୍କ ସହ ଦୀପାବଳି ପାଳନ କରିବେ ବୋଲି ସେ କହିଛନ୍ତି। ସୋସିଆଲ ମିଡିଆ ପ୍ଲାଟଫର୍ମ Xରେ ଏକ ଭିଡିଓ ବାର୍ତ୍ତା ଜରିଆରେ ପ୍ରଧାନମନ୍ତ୍ରୀ ଦେଶବାସୀଙ୍କୁ ଏହି ଶୁଭେଚ୍ଛା ଜଣାଇଛନ୍ତି।

ପ୍ରଧାନମନ୍ତ୍ରୀ କହିଛନ୍ତି, ଦୀପାବଳି ହେଉଛି ଖୁସି ଓ ଉତ୍ସାହର ପର୍ବ। ଏହି ଅବସରରେ ସମସ୍ତଙ୍କ ଜୀବନରେ ଶାନ୍ତି, ସମୃଦ୍ଧି ଓ ସୁଖ ଭରିଯାଉ ବୋଲି ସେ କାମନା କରିଛନ୍ତି। ପ୍ରତିବର୍ଷ ଭଳି ଏଥର ମଧ୍ୟ ସେ ଦେଶର ସାହସୀ ସୈନିକମାନଙ୍କ ସହ ଏହି ପର୍ବ ପାଳନ କରିବାର ପରମ୍ପରା ଜାରି ରଖିବେ ବୋଲି କହିଛନ୍ତି। ତେବେ ଏଥର କେଉଁ ସାମରିକ ଘାଟିରେ ସେ ଯବାନଙ୍କ ସହ ଦୀପାବଳି ପାଳନ କରିବେ, ସେନେଇ କୌଣସି ସୂଚନା ଦେଇନାହାନ୍ତି।

#WATCH | Prime Minister Narendra Modi extends greetings for Diwali to the people of the country. He says, "... Like you, I celebrate Diwali with great enthusiasm; and as you know, it has become a regular practice of mine to spend this time among our soldiers—a tradition I will continue this year as well..." (Source: Narendra Modi/'X')

— ANI (@ANI) November 7, 2026

ଅନ୍ଧକାର ଉପରେ ଆଲୋକର ବିଜୟର ପ୍ରତୀକ ଦୀପାବଳି:
ଦୀପାବଳି କେବଳ ଆଲୋକର ପର୍ବ ନୁହେଁ, ଏହା ଅନ୍ଧକାର ଉପରେ ଆଲୋକ, ଅସତ୍ୟ ଉପରେ ସତ୍ୟ ଏବଂ ନିରାଶା ଉପରେ ଆଶାର ବିଜୟର ପ୍ରତୀକ ବୋଲି ମୋଦୀ କହିଛନ୍ତି। ଦୀପାବଳି ପୂର୍ବ ସନ୍ଧ୍ୟାରେ ସାରା ଦେଶ ଆଲୋକମାଳାରେ ଝଲସି ଉଠିଥିବା ବେଳେ ଏହା ଅନ୍ଧକାର ବିରୋଧରେ ଦେଶର ସଂକଳ୍ପକୁ ପ୍ରତିଫଳିତ କରୁଛି ବୋଲି ସେ ଉଲ୍ଲେଖ କରିଛନ୍ତି।

ବିକଶିତ ଭାରତ ଗଠନ ପାଇଁ ଦେଲେ ଆହ୍ୱାନ:
ଏହି ଅବସରରେ ପ୍ରଧାନମନ୍ତ୍ରୀ ଦେଶବାସୀଙ୍କୁ ଏକ ସମୃଦ୍ଧ ଓ ବିକଶିତ ଭାରତ ଗଠନ ପାଇଁ ନୂଆ ଉତ୍ସାହ ଓ ସଂକଳ୍ପ ସହ ଆଗକୁ ବଢ଼ିବାକୁ ଆହ୍ୱାନ ଦେଇଛନ୍ତି। ପର୍ବପର୍ବାଣୀର ଏହି ଋତୁ ସମସ୍ତଙ୍କୁ ଦୟା, ସକାରାତ୍ମକ ଚିନ୍ତାଧାରା ଓ ଉଜ୍ଜ୍ୱଳ ଭବିଷ୍ୟତ ଗଠନ ପାଇଁ ପ୍ରେରଣା ଯୋଗାଉ ବୋଲି ସେ ଆଶା ପ୍ରକାଶ କରିଛନ୍ତି।

ଏଥିସହ ଦୀପାବଳି ଭାରତର ସମୃଦ୍ଧ ପରମ୍ପରା ଓ ସଂସ୍କୃତିକୁ ସମ୍ମାନ ଦେବା ସହ ଦେଶବାସୀଙ୍କ ମଧ୍ୟରେ ଏକତାର ବନ୍ଧନକୁ ଆହୁରି ମଜଭୁତ କରିବାର ଏକ ସୁଯୋଗ ବୋଲି ପ୍ରଧାନମନ୍ତ୍ରୀ ନିଜ ବାର୍ତ୍ତାରେ କହିଛନ୍ତି।