ECL Finance କୁ ସୁପ୍ରିମକୋର୍ଟରୁ ବଡ଼ ଝଟ୍‌କା! CoC ରେ ସାମିଲ ହେବା ଉପରେ ରୋକ୍, ଜାଣନ୍ତୁ ପୂରା ମାମଲା...

ନୂଆଦିଲ୍ଲୀ: ଏମିତି ଏକ ଫାଇନାନ୍ସ କମ୍ପାନୀ ଯିଏ କୌଣସି ଅନ୍ୟ କମ୍ପାନୀକୁ କେବଳ ଋଣ ଦେଉନଥିଲା ବରଂ ସେହି କମ୍ପାନୀର ପ୍ରତ୍ୟେକ ଛୋଟ-ବଡ଼ ନିଷ୍ପତ୍ତି ଏବଂ କାର୍ଯ୍ୟକଳାପରେ ହସ୍ତକ୍ଷେପ ମଧ୍ୟ କରୁଥିଲା। ସୁପ୍ରିମକୋର୍ଟ ସ୍ପଷ୍ଟ କରିଦେଇଛନ୍ତି ଯେ, ଯଦି କୌଣସି ଋଣ ପ୍ରଦାନକାରୀ କମ୍ପାନୀ ଋଣଗ୍ରହିତା କମ୍ପାନୀର ନୀତିଗତ ନିଷ୍ପତ୍ତିରେ ହସ୍ତକ୍ଷେପ ରଖୁଛି, ତେବେ ତାହାକୁ କେବଳ ଋଣଦାତା କୁହାଯାଇପାରିବ ନାହିଁ, ବରଂ ସେ କମ୍ପାନୀର ଏକ 'ରିଲେଟେଡ୍ ପାର୍ଟି' ଅଟେ। ସୁପ୍ରିମକୋର୍ଟ ECL ଫାଇନାନ୍ସ ଲିମିଟେଡ୍ ଉପରେ ପ୍ରଶ୍ନ ଉଠାଇଛନ୍ତି। ସୁପ୍ରିମକୋର୍ଟରେ ECL ଫାଇନାନ୍ସ ଲିମିଟେଡ୍‌ର କାରନାମା କେମିତି ସାମ୍ନାକୁ ଆସିଲା ଆସନ୍ତୁ ଜାଣିବା ।

ଘର କ୍ରେତାମାନଙ୍କୁ ପ୍ରତାରଣା କରିବା ପାଇଁ ଆସିଥିଲା ହାଉସିଂ ପ୍ରୋଜେକ୍ଟ
କୌଣସି ହାଉସିଂ ପ୍ରୋଜେକ୍ଟ କେଉଁ ଉଦ୍ଦେଶ୍ୟରେ ତିଆରି କରାଯାଏ? ଯେମିତି ଲୋକଙ୍କୁ ଘର ମିଳିବ ଏବଂ ରିଅଲ ଇଷ୍ଟେଟ୍ କମ୍ପାନୀକୁ ଲାଭ ମିଳିବ। କିନ୍ତୁ, ଏହି ହାଉସିଂ ପ୍ରୋଜେକ୍ଟକୁ ଘର କ୍ରେତାମାନଙ୍କୁ ଠକିବା ଏବଂ ଆର୍ଥିକ କମ୍ପାନୀଗୁଡ଼ିକରୁ କେବଳ ଋଣ ନେବା ଉଦ୍ଦେଶ୍ୟରେ ଆରମ୍ଭ କରାଯାଇଥିଲା।

ଏମିତି ଆରମ୍ଭ ହେଲା ହେରଫେରର ଖେଳ
ବର୍ଷ ୨୦୧୬ରେ ସାହା ଇନଫ୍ରାଟେକ ନାମକ କମ୍ପାନୀ ଗ୍ରେଟର ନୋଏଡାରେ ଏକ ରିଅଲ ଇଷ୍ଟେଟ୍ ପ୍ରୋଜେକ୍ଟ ତିଆରି କରୁଥିଲା। ପ୍ରୋଜେକ୍ଟର ନାମ ଥିଲା 'ପ୍ରୋଜେକ୍ଟ ଏନକୋର', ଯାହାକୁ ପରବର୍ତ୍ତୀ ସମୟରେ 'ମେଘଦୂତମ ଏନକୋର' କୁହାଗଲା। ଏହି ପ୍ରୋଜେକ୍ଟ ପାଇଁ ୨୦୧୬ରେ ୧୬୦ କୋଟି ଟଙ୍କାର ଡିବେଞ୍ଚର ଜାରି କରିବାକୁ ଯୋଜନା କରାଯାଇଥିଲା। କିନ୍ତୁ ମାତ୍ର ୧୧୦ କୋଟି ଟଙ୍କା ଜାରି ହେଲା ଏବଂ ଏହି ସମସ୍ତ ଡିବେଞ୍ଚରକୁ ECL ଫାଇନାନ୍ସ କିଣିନେଲା। ଏହି ଚୁକ୍ତିରେ ପାମ୍ ଡେଭଲପର୍ସ ଗ୍ୟାରେଣ୍ଟର ଭୂମିକା ଗ୍ରହଣ କରିଥିଲା। ଅର୍ଥାତ୍, ଯଦି ସାହା ଇନଫ୍ରାଟେକ ଟଙ୍କା ପରିଶୋଧ ନକରେ, ତେବେ ପାମ୍ ଡେଭଲପର୍ସ ଉପରେ ଏହାର ଦାୟିତ୍ୱ ଆସିବ। ବର୍ଷ ୨୦୧୭ରେ ECL ଫାଇନାନ୍ସ ସାହା ଇନଫ୍ରାଟେକକୁ ଆଉ ୯୦ କୋଟି ଟଙ୍କାର କ୍ରେଡିଟ୍ ସୁବିଧା ଦେଇଥିଲା। ଏଥିରେ ମଧ୍ୟ ପାମ୍ ଡେଭଲପର୍ସ ଗ୍ୟାରେଣ୍ଟର ସାଜିଥିଲା। ଏହିଠାରୁ ହିଁ ଟଙ୍କାର କାରବାର ଏବଂ ହେରଫେରର ଖେଳ ଆରମ୍ଭ ହୋଇଥିଲା।

ଫରେନ୍ସିକ ଅଡିଟ୍‌ରେ ଚମକାଇଦେଲା ଭଳି ଖୁଲାସା
ସୁପ୍ରିମକୋର୍ଟଙ୍କ ସାମ୍ନାରେ ଉପସ୍ଥାପିତ ଏକ ଫରେନ୍ସିକ ଅଡିଟ୍ ରିପୋର୍ଟରେ ଚମକାଇଦେଲା ଭଳି ଖୁଲାସା ହୋଇଛି। ରିପୋର୍ଟ ଅନୁଯାୟୀ, ପାମ୍ ଡେଭଲପର୍ସ, ଯିଏ କି ସାହା ଇନଫ୍ରାଟେକର କର୍ପୋରେଟ୍ ଗ୍ୟାରେଣ୍ଟର ଥିଲା, ତାହାକୁ ଏକ ମାଧ୍ୟମ ଭାବରେ ବ୍ୟବହାର କରାଯାଇଥିଲା, ଯେମିତି ସାହା ଇନଫ୍ରାଟେକରୁ ଟଙ୍କା ନେଇ ଅନ୍ୟ ଦୁଇଟି କମ୍ପାନୀକୁ ପଠାଯାଇପାରିବ।

କମ୍ପାନୀଗୁଡ଼ିକ ଉପରେ ECL ଫାଇନାନ୍ସର ନିୟନ୍ତ୍ରଣ
ସେହି କମ୍ପାନୀଗୁଡ଼ିକ ପାମ୍ ଡେଭଲପର୍ସର ପ୍ରମୋଟରମାନଙ୍କ କମ୍ପାନୀ ବୋଲି କୁହାଗଲା। ଫରେନ୍ସିକ ରିପୋର୍ଟରୁ ଜଣାପଡିଛି ଯେ ସେହି ଦୁଇଟି କମ୍ପାନୀ ଉପରେ ECL ଫାଇନାନ୍ସର ହିଁ ନିୟନ୍ତ୍ରଣ ଥିଲା। ଏହାପରର କାରନାମା ଆହୁରି ଆଶ୍ଚର୍ଯ୍ୟଜନକ ଥିଲା। ବର୍ଷ ୨୦୨୦ରେ ପାମ୍ ଡେଭଲପର୍ସ ଦେବାଳିଆ ହୋଇଗଲା।

ECL ଫାଇନାନ୍ସ ଏବଂ ତାହାର ଡିବେଞ୍ଚର ଟ୍ରଷ୍ଟି ମିଶି ପ୍ରାୟ ୨୭୦ କୋଟି ଟଙ୍କାର ଦାବି ଉପସ୍ଥାପନ କଲେ ଏବଂ ନିଜକୁ ସେହି କମିଟିରେ ସାମିଲ କରିନେଲେ ଯିଏ କମ୍ପାନୀର ଭବିଷ୍ୟତ କଣ ହେବ ତାହା ସ୍ଥିର କରେ, ସେହି କମିଟିକୁ 'କମିଟି ଅଫ୍ କ୍ରେଡିଟର୍ସ' (CoC) କୁହାଯାଏ।

ନିୟମ ହେଉଛି CoC ରେ କେବଳ ସେହି ଋଣଦାତାମାନେ ବସିପାରିବେ ଯେଉଁମାନେ କମ୍ପାନୀର "ନିଜ ଲୋକ" (ସମ୍ପର୍କିତ ପକ୍ଷ) ନୁହନ୍ତି। ଏହିଠାରୁ ହିଁ ECL ଫାଇନାନ୍ସ ଲିମିଟେଡ୍‌ର କାରନାମାର ପରସ୍ତ ଖୋଲିବା ଆରମ୍ଭ ହୋଇଗଲା।

ECL ପାଖରେ କେବଳ ଟଙ୍କା ଆଦାୟ କରିବାର ଅଧିକାର ନଥିଲା
ସୁପ୍ରିମକୋର୍ଟ ଯେତେବେଳେ ପାମ୍ ଡେଭଲପର୍ସର ଦେବାଳିଆ ପ୍ରକ୍ରିୟା ଏବଂ ECL ଫାଇନାନ୍ସ ସହ ଜଡ଼ିତ ଦସ୍ତାବିଜଗୁଡ଼ିକୁ ଯାଞ୍ଚ କଲେ, ସେତେବେଳେ ଯାହା ସାମ୍ନାକୁ ଆସିଲା ତାହା ଚମକାଇ ଦେଲା ଭଳି ଥିଲା। ECL ପାଖରେ କେବଳ ନିଜ ଟଙ୍କା ଆଦାୟ କରିବାର ଅଧିକାର ନଥିଲା।

ସୁପ୍ରିମକୋର୍ଟ NCLT ର ଆଦେଶକୁ କାଏମ ରଖିଲେ
ECL ପାଖରେ କମ୍ପାନୀରେ ନିର୍ଦ୍ଦେଶକ ନିଯୁକ୍ତ କରିବାର ଅଧିକାର, ବୋର୍ଡରେ କୌଣସି ବିବାଦ ଉପରେ ଶେଷ ନିଷ୍ପତ୍ତି ନେବାର ଅଧିକାର ଏବଂ ପ୍ରତି ତ୍ରୈମାସିକ ବଜେଟ୍ ମଞ୍ଜୁର କରିବାର ଅଧିକାର ଥିଲା। କୌଣସି ପରିଚାଳନା ଅଧିକାରୀଙ୍କୁ ହଟାଇବା ଉପରେ ଭିଟୋ ପ୍ରୟୋଗ କରିବାର ଅଧିକାର ମଧ୍ୟ ଥିଲା। ଏପରିକି କମ୍ପାନୀର ବ୍ୟାଙ୍କ ଆକାଉଣ୍ଟ ଉପରେ ମଧ୍ୟ ସିଧାସଳଖ ନିୟନ୍ତ୍ରଣ ଥିଲା। ଏହିସବୁ ଦସ୍ତାବିଜକୁ ଯାଞ୍ଚ କରିବା ପରେ ନ୍ୟାସନାଲ କମ୍ପାନୀ ଲ' ଟ୍ରିବ୍ୟୁନାଲ (NCLT) ECL ଫାଇନାନ୍ସ ଲିମିଟେଡକୁ କମିଟି ଅଫ୍ କ୍ରେଡିଟର୍ସ (CoC) ରୁ ବାହାର କରିଦେଇଥିଲା।

ବିଗତ ଦିନରେ ସୁପ୍ରିମକୋର୍ଟ NCLT ର ଏହି ଆଦେଶକୁ କାଏମ ରଖି ECL ଫାଇନାନ୍ସକୁ CoC ରୁ ବାହାରେ ରଖିବା ନିଷ୍ପତ୍ତି ଉପରେ ମୋହର ଲଗାଇ ଦେଇଛନ୍ତି। ଏହାସହ ସୁପ୍ରିମକୋର୍ଟ କଡ଼ା ଟିପ୍ପଣୀ କରି କହିଛନ୍ତି ଯେ, କମ୍ପାନୀର କାର୍ଯ୍ୟକଳାପରେ ହସ୍ତକ୍ଷେପ ରଖୁଥିବା କମ୍ପାନୀ ଜଣେ ସାଧାରଣ ବାହାରର ଋଣଦାତା ନୁହେଁ ବରଂ "ନିଜ ଲୋକ" ବୋଲି ଧରାଯିବ, ତେଣୁ ତାଙ୍କର ଟଙ୍କା କମ୍ପାନୀ ଉପରେ ବାକି ଥିଲେ ମଧ୍ୟ ସେହି କମିଟିରେ ବସିବାର ତାଙ୍କର କୌଣସି ଅଧିକାର ନାହିଁ।

ଅନିୟମିତତାରେ ଦୋଷୀ ସାବ୍ୟସ୍ତ
ECL ଫାଇନାନ୍ସ ପାଇଁ ସୁପ୍ରିମକୋର୍ଟଙ୍କ ଆଦେଶ କୌଣସି ବଡ଼ ଝଟ୍‌କାରୁ କମ୍ ନୁହେଁ। କେବଳ ସୁପ୍ରିମକୋର୍ଟ ନୁହନ୍ତି, ବରଂ ରିଜର୍ଭ ବ୍ୟାଙ୍କ (RBI) ମଧ୍ୟ ECL ଫାଇନାନ୍ସକୁ ପୂର୍ବରୁ ଝଟ୍‌କା ଦେଇ ସାରିଛି। ମେ ୨୦୨୪ରେ RBI, ECL ଫାଇନାନ୍ସ ଏବଂ ତାର ଗ୍ରୁପ୍ କମ୍ପାନୀ Edelweiss ARC ଉପରେ ବ୍ୟବସାୟିକ କଟକଣା ଲଗାଇଥିଲା, କାରଣ RBI ତାର ଯାଞ୍ଚରେ ଏଡଲୱାଇସର ଏହି ଦୁଇଟିଯାକ କମ୍ପାନୀକୁ ଋଣ ସମ୍ବନ୍ଧୀୟ ମାମଲାରେ ଅନେକ ଅନିୟମିତତା ପାଇଁ ଦୋଷୀ ସାବ୍ୟସ୍ତ କରିଥିଲା।

ପରିବେଶ ବାତ୍ସାୟନ, ସ୍ପେଶାଲ ଇନଭେଷ୍ଟିଗେସନ ଟିମ୍, ଜୀ ମିଡିଆ ।

Also Read- Top 10 News: ରାଜ୍ୟସଭାକୁ ନିର୍ବାଚିତ ହେଲେ ହରଦୀପ ସିଂ ପୁରୀ, OPSC ୩୪୦ ପଦ ପାଇଁ ବିଜ୍ଞପ୍ତି ଓ ଅନ୍ୟ ଖବର