Top 10 News: ଚୁଟକିରେ ପଢ଼ନ୍ତୁ ଆଜି ସକାଳର ୧୦ଟି ଗୁରୁତ୍ୱପୂର୍ଣ୍ଣ ଖବର...

1.Bhubaneswar Crime: ଭୁବନେଶ୍ୱର ବମିଖାଲ ଗୁଳିକାଣ୍ଡ ମାମଲାରେ ୪ ଗିରଫ। ଘଟଣାରେ ସମ୍ପୃକ୍ତ ୪ ଅଭିଯୁକ୍ତଙ୍କୁ ଲକ୍ଷ୍ମୀସାଗର ଥାନା ପୋଲିସ ଗିରଫ କରିଛି। ସୂଚନା ଅନୁସାରେ, ରାତି ପ୍ରାୟ ୩ଟା ସମୟରେ ବମିଖାଲସ୍ଥିତ ସରକାରୀ ବନ୍ଧୁକ ଦୋକାନ ସମ୍ମୁଖରେ ଏହି ଗୁଳିକାଣ୍ଡ ଘଟିଥିଲା। ଅଭିଯୁକ୍ତମାନେ ଜଣେ ଯୁବକଙ୍କ ମୁଣ୍ଡକୁ ଅତି ନିକଟରୁ ଗୁଳି କରି ହତ୍ୟା କରିଥିବା ଅଭିଯୋଗ ରହିଛି। ଏହି ଘଟଣାକୁ ନେଇ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଥିଲା।

2.Crime: ଭୁବନେଶ୍ୱର VSS ନଗର ତାରିଣୀ ବସ୍ତିରେ ହତ୍ୟାକାଣ୍ଡ। ପରକୀୟା ପ୍ରୀତିକୁ ନେଇ ସନ୍ଦେହରେ ଜଣେ ଯୁବକଙ୍କୁ ପଥରରେ ଛେଚି ହତ୍ୟା କରାଯାଇଥିବା ଅଭିଯୋଗ ହୋଇଛି। ମୃତ ଯୁବକଙ୍କ ଘର ଗଞ୍ଜାମ ଜିଲ୍ଲାରେ ବୋଲି ସୂଚନା ମିଳିଛି। ସୂଚନା ଅନୁସାରେ, ମୃତକ ତାରିଣୀ ବସ୍ତିରେ ରହୁଥିବା ଜଣେ ନେପାଳୀ ଦମ୍ପତିଙ୍କ ପଡ଼ୋଶୀ ଥିଲେ। ପରକୀୟା ପ୍ରୀତି ସନ୍ଦେହକୁ କେନ୍ଦ୍ର କରି ଏହି ହତ୍ୟାକାଣ୍ଡ ଘଟିଥିବା ପ୍ରାଥମିକ ସୂଚନା ମିଳିଛି। ଘଟଣାରେ ପୋଲିସ ଜଣେ ବ୍ୟକ୍ତିଙ୍କୁ ଅଟକ ରଖି ତଦନ୍ତ ଚଳାଇଛି। ହତ୍ୟା ପଛର ପ୍ରକୃତ କାରଣ ଓ ଅନ୍ୟାନ୍ୟ ତଥ୍ୟ ପୋଲିସ ତଦନ୍ତ ପରେ ସ୍ପଷ୍ଟ ହେବ।

3.Kalipuja: ଦୀପାବଳି ଓ କାଳୀପୂଜା ପାଇଁ ଉତ୍ସବମୁଖର ସାରା ଓଡ଼ିଶା। ଆସନ୍ତାକାଲି ପବିତ୍ର ଦୀପାବଳି ଓ କାଳୀପୂଜା ଥିବାରୁ ଗାଁଠୁ ସହର ସବୁଠି ଉତ୍ସବର ମାହୋଲ ଦେଖିବାକୁ ମିଳୁଛି। ରଙ୍ଗବେରଙ୍ଗ ଆଲୋକମାଳାରେ ଝଲସୁଛି ରାସ୍ତାଘାଟ, ବଜାର ଓ ପୂଜା ମଣ୍ଡପ। ପର୍ବକୁ ନେଇ ଲୋକଙ୍କ ମଧ୍ୟରେ ବେଶ୍ ଉତ୍ସାହ ଓ ଉଦ୍ଦୀପନା ଦେଖାଦେଇଛି। ଦୀପାବଳି ପାଇଁ ବଜାରରେ ଲୋକଙ୍କ ଭିଡ଼ ଜମୁଥିବା ବେଳେ ଦୀପ, ମହମବତୀ ଓ ପୂଜା ସାମଗ୍ରୀ କିଣାକିଣି ଜୋର୍ ଧରିଛି। ଅନ୍ୟପଟେ ବିଭିନ୍ନ ସ୍ଥାନରେ କାଳୀପୂଜା ମଣ୍ଡପଗୁଡ଼ିକୁ ଆକର୍ଷଣୀୟ ଆଲୋକସଜ୍ଜାରେ ସଜାଯାଇଛି। ପବିତ୍ର ପର୍ବକୁ ନେଇ ସବୁଠି ଖୁସି ଓ ଉତ୍ସାହର ପରିବେଶ ସୃଷ୍ଟି ହୋଇଛି।

4. CM Mohan Majhi: ଚଳିତ ବର୍ଷ ଦୀପାବଳି ପାଳନ କରିବେନି ମୁଖ୍ୟମନ୍ତ୍ରୀ ମୋହନ ମାଝୀ। ବାତ୍ୟା ‘ଅର୍ଣ୍ଣବ’ ପରବର୍ତ୍ତୀ ବନ୍ୟା ବିପର୍ଯ୍ୟୟରେ ଦକ୍ଷିଣ ଓଡ଼ିଶାର ଅନେକ ଲୋକ ପ୍ରଭାବିତ ହୋଇଥିବାରୁ ମୁଖ୍ୟମନ୍ତ୍ରୀ ଏହି ନିଷ୍ପତ୍ତି ନେଇଛନ୍ତି। ଏଥର ମୁଖ୍ୟମନ୍ତ୍ରୀ ନିବାସରେ ଦୀପାବଳି ଉତ୍ସବ ପାଳନ କରାଯିବ ନାହିଁ। ଏଥିସହ ମୁଖ୍ୟମନ୍ତ୍ରୀ ନିବାସକୁ କେହି ଉପହାର କିମ୍ବା ଫୁଲତୋଡ଼ା ନେଇ ନ ଆସିବାକୁ ଅନୁରୋଧ କରାଯାଇଛି। ବିପର୍ଯ୍ୟୟ ସମୟରେ ଉତ୍ସବ ପାଳନ ପରିବର୍ତ୍ତେ ବନ୍ୟା ପ୍ରଭାବିତ ଲୋକଙ୍କ ଦୁଃଖ ଓ ଅସୁବିଧା ପ୍ରତି ସମ୍ବେଦନଶୀଳ ହେବାକୁ ମୁଖ୍ୟମନ୍ତ୍ରୀ ଆହ୍ୱାନ ଦେଇଛନ୍ତି। ଏଥିସହ ଦକ୍ଷିଣ ଓଡ଼ିଶାର ବିପର୍ଯ୍ୟୟ ପ୍ରଭାବିତ ପରିବାରଗୁଡ଼ିକୁ ସହାୟତାର ହାତ ବଢ଼ାଇବା ସହ ଏହି କଷ୍ଟକର ସମୟରେ ସେମାନଙ୍କ ପାଖରେ ଠିଆ ହେବାକୁ ମୁଖ୍ୟମନ୍ତ୍ରୀ ରାଜ୍ୟବାସୀଙ୍କୁ ଅନୁରୋଧ କରିଛନ୍ତି।

5.Kandhamal: ବାତ୍ୟା ‘ଅର୍ଣ୍ଣବ’ ପରେ କ୍ଷତିଗ୍ରସ୍ତ ହୋଇଥିବା ଦାରିଙ୍ଗବାଡ଼ି-ଗାଜଲବାଡ଼ି ଘାଟି ରାସ୍ତାରେ ଏବେ ହାଲୁକା ମୋଟର ଯାନ ଚଳାଚଳକୁ ଅନୁମତି ମିଳିଛି। ରାସ୍ତାର ଅସ୍ଥାୟୀ ମରାମତି କାର୍ଯ୍ୟ ଶେଷ ହେବା ପରେ କନ୍ଧମାଳ ଜିଲ୍ଲାପାଳ ଏହି ନିଷ୍ପତ୍ତି ନେଇଛନ୍ତି। ତେବେ ଏହି ରାସ୍ତାରେ ଭାରୀ ଯାନ ଚଳାଚଳ ଉପରେ କଟକଣା ବଳବତ୍ତର ରହିବ।

6.Election Commission of India: ଭୋଟର ତାଲିକାରୁ ବାଦ୍ ପଡ଼ିଥିବା ଲୋକଙ୍କ ପାଇଁ ବଡ଼ ଆଶ୍ୱସ୍ତିକର ଖବର। ଭାରତୀୟ ନିର୍ବାଚନ ଆୟୋଗ (ECI) ନେଇଛନ୍ତି ଏକ ବଡ଼ ନିଷ୍ପତ୍ତି। ଦିଲ୍ଲୀ ସମେତ ଦେଶର ୭ଟି ରାଜ୍ୟର ଯେଉଁ ଯୋଗ୍ୟ ଭୋଟରଙ୍କ ନାମ ସ୍ୱତନ୍ତ୍ର ଗଭୀର ସଂଶୋଧନ (SIR) ସମୟରେ ଡ୍ରାଫ୍ଟ ଭୋଟର ତାଲିକାରେ ସ୍ଥାନ ପାଇନାହିଁ, ସେମାନଙ୍କୁ ପୁଣିଥରେ ନାମ ପଞ୍ଜୀକରଣ କରିବାକୁ ସୁଯୋଗ ମିଳିବ। ଏହି ନିଷ୍ପତ୍ତି ଫଳରେ ଲକ୍ଷାଧିକ ଭୋଟର ଉପକୃତ ହୋଇପାରନ୍ତି।

7.Donald Trump: ହ୍ୱାଇଟ୍ ହାଉସ୍ ନିକଟରେ ଟ୍ରମ୍ପଙ୍କୁ ହତ୍ୟା ଧମକ ଦେବା ଅଭିଯୋଗରେ ଜଣେ ଭେନେଜୁଏଲା ନାଗରିକ ଗିରଫ। ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ହତ୍ୟା ଧମକ ଦେଇଥିବା ଅଭିଯୋଗରେ ହ୍ୱାଇଟ୍ ହାଉସ୍ ନିକଟରୁ ଜଣେ ଭେନେଜୁଏଲା ନାଗରିକଙ୍କୁ ଗିରଫ କରାଯାଇଛି। ଆମେରିକାର ହୋମଲ୍ୟାଣ୍ଡ ସିକ୍ୟୁରିଟି ବିଭାଗ (DHS) ଏବଂ ୟୁଏସ୍ ସିକ୍ରେଟ୍ ସର୍ଭିସ୍ ଅଧିକାରୀଙ୍କ ସୂଚନା ଅନୁସାରେ, ଅଭିଯୁକ୍ତ ବ୍ୟବହାର କରୁଥିବା ଗାଡ଼ିରୁ ଏକାଧିକ ଅସ୍ତ୍ରଶସ୍ତ୍ର ଜବତ ହୋଇଛି। ଏହି ଘଟଣା ପରେ ସୁରକ୍ଷା ଏଜେନ୍ସିଗୁଡ଼ିକ ପକ୍ଷରୁ ତଦନ୍ତ ଜାରି ରହିଛି।

8.Odisha Weather: ଶୀତ ବଢ଼ିବା ସହ ଛେଣ୍ଡିପଦାରେ ଘନ କୁହୁଡ଼ି, ୧୦ ମିଟର ଦୂରତା ବି ଦେଖାଯାଉନି। ଅନୁଗୋଳ ଜିଲ୍ଲା ଛେଣ୍ଡିପଦା ବ୍ଲକ୍‌ ଓ ଏହାର ଆଖପାଖ ଅଞ୍ଚଳରେ ସକାଳୁ ସକାଳୁ ଘନ କୁହୁଡ଼ିର ଆସ୍ତରଣ ଦେଖିବାକୁ ମିଳିଛି। ଭୋର ପ୍ରାୟ ୫ଟାରୁ ରାସ୍ତାଘାଟ, ବିଲ, ପୋଖରୀ ଓ ଗଛଲତା ସବୁ କୁହୁଡ଼ିର ଧଳା ଚାଦରରେ ଢାଙ୍କି ହୋଇଯାଇଛି। ଘନ କୁହୁଡ଼ି ଯୋଗୁଁ ମାତ୍ର ୧୦ ମିଟର ଦୂରରୁ ମଧ୍ୟ ରାସ୍ତା ଦେଖିବା କଷ୍ଟକର ହୋଇପଡ଼ିଛି। ଏହାର ପ୍ରଭାବ ଜାତୀୟ ରାଜପଥଠାରୁ ଆରମ୍ଭ କରି ଗ୍ରାମ୍ୟ ରାସ୍ତା ପର୍ଯ୍ୟନ୍ତ ଯାତାୟାତ ଉପରେ ପଡ଼ିଛି। ବାଇକ୍‌, କାର୍‌ ଓ ବସ୍‌ ଚାଳକମାନେ ହେଡ୍‌ଲାଇଟ୍‌ ଜଳାଇ ଅତି ସତର୍କତାର ସହ ଧୀରେ ଧୀରେ ଗାଡ଼ି ଚଳାଉଛନ୍ତି।

9.Vigilance Raid: ଲାଞ୍ଚ ନେବା ବେଳେ ଭିଜିଲାନ୍ସ ଜାଲରେ ସରକାରୀ ITI କଲେଜ ପ୍ରିନ୍ସିପାଲ। ବଲାଙ୍ଗୀର ସରକାରୀ ଆଇଟିଆଇ କଲେଜର ପ୍ରିନ୍ସିପାଲ ସୁରେଶ କୁମାର ଦଳବେହେରା ଲାଞ୍ଚ ଟଙ୍କା ସହ ଧରାପଡ଼ିଛନ୍ତି। ଚାକିରି କରାଇଦେବା ଓ ଦରମା ମଞ୍ଜୁର କରାଇବାର ପ୍ରତିଶ୍ରୁତି ଦେଇ ଜଣେ ଅତିଥି ଅଧ୍ୟାପକଙ୍କଠାରୁ ସେ ମୋଟା ଅଙ୍କର ଟଙ୍କା ଦାବି କରୁଥିବା ଅଭିଯୋଗ ହୋଇଛି। ସୂଚନା ଅନୁସାରେ, ଲାଞ୍ଚ କାରବାର ଚାଲିଥିବା ସମୟରେ ସମ୍ବଲପୁର ଭିଜିଲାନ୍ସ ଟିମ୍ ଚଢ଼ାଉ କରି ପ୍ରିନ୍ସିପାଲଙ୍କୁ ଧରିଥିଲା। ଏହାପରେ ତାଙ୍କ ସହ ଜଡ଼ିତ ବିଭିନ୍ନ ଠିକଣାରେ ଭିଜିଲାନ୍ସ ପକ୍ଷରୁ ଏକକାଳୀନ ଚଢ଼ାଉ କରାଯାଇଛି।

10. Mohammed Shami: ଭାରତୀୟ କ୍ରିକେଟ୍‌ର ଅନ୍ୟତମ ଦ୍ରୁତ ବୋଲର ମହମ୍ମଦ ଶାମି ଟେଷ୍ଟ କ୍ରିକେଟ୍‌ରୁ ଅବସର ଘୋଷଣା କରିଛନ୍ତି। ଶୁକ୍ରବାର ରାତିରେ ଇନଷ୍ଟାଗ୍ରାମ୍‌ରେ ଏକ ଭାବପ୍ରବଣ ପୋଷ୍ଟ କରି ସେ ଟେଷ୍ଟ କ୍ରିକେଟ୍‌କୁ ବିଦାୟ ଜଣାଇଛନ୍ତି। ଏହା ସହ ଦୀର୍ଘ ୧୩ ବର୍ଷର ଟେଷ୍ଟ କ୍ରିକେଟ୍‌ ଯାତ୍ରାରେ ପୂର୍ଣ୍ଣଚ୍ଛେଦ ପଡ଼ିଛି। ସଂଯୋଗବଶତଃ, ଟେଷ୍ଟ କ୍ରିକେଟ୍‌ରୁ ତାଙ୍କର ଅବସର ଘୋଷଣା ଦିନଟି ତାଙ୍କ ଟେଷ୍ଟ ପଦାର୍ପଣର ୧୩ ବର୍ଷ ପୂର୍ତ୍ତି ସହ ମେଳ ଖାଇଛି। ୨୦୧୩ ନଭେମ୍ବର ୬ ତାରିଖରେ କୋଲକାତାରେ ୱେଷ୍ଟଇଣ୍ଡିଜ୍ ବିପକ୍ଷରେ ସେ ଭାରତ ପକ୍ଷରୁ ପ୍ରଥମ ଟେଷ୍ଟ ମ୍ୟାଚ୍ ଖେଳିଥିଲେ।