Dhanu Yatra 2027: ଜାନୁଆରୀରେ ବିଶ୍ବପ୍ରସିଦ୍ଧ ବରଗଡ଼ ଧନୁଯାତ୍ରା, ଜାଣନ୍ତୁ ତାରିଖ

Dhanu Yatra 2027: କଂସ ଅଟ୍ଟହାସ୍ୟରେ କମ୍ପିବ ପୂରା ବରଗଡ଼। ମୁକ୍ତାକାଶ ରଙ୍ଗମଂଚରେ କଳା ପ୍ରଦର୍ଶନ କରିବେ କଳାକାର।  କାହିଁକିନା ଆସନ୍ତା ବର୍ଷ  ଜାନୁଆରୀ ୧୨ ତାରିଖରୁ ୨୨ ଯାଏଁ ଚାଲିବ ଧନୁଯାତ୍ରା। ଏ-ନେଇ ଧନୁଯାତ୍ରା ପ୍ରସ୍ତୁତି କମିଟି ପକ୍ଷରୁ ନିଷ୍ପତ୍ତି ପରେ ଜିଲ୍ଲାପାଳଙ୍କ ପକ୍ଷରୁ ସୂଚନା ଦେଇଛନ୍ତି। ଆଜି ଜିଲ୍ଲାପାଳ ଆଦିତ୍ୟ ଗୋୟଲଙ୍କ ଅଧ୍ୟକ୍ଷତାରେ ବସିଥିବା ବୈଠକରେ ଏହି ନିସ୍ପତ୍ତି ନିଆଯାଇଛି। ସବୁଠୁ ଗୁରୁତ୍ବପୂର୍ଣ୍ଣ କଥା ହେଉଛି କଂସ ଚରିତ୍ର ପାଇଁ କଳାକାର ଚୟନ ଲାଗି ବି ପ୍ରକ୍ରିୟା ଆରମ୍ଭ ହେବ। ଏଥର କିଏ ହେବ କଂସ। କାହାକୁ ମିଳିବ ଏ ଚରିତ୍ର। ତାହାକୁ ନେଇ ସସପେନ୍ସ ଏବେଠୁ ବଢି ଚାଲିଛି।

ଧନୁଯାତ୍ରାର ସବୁଠୁ ମୁଖ୍ୟ ଆକର୍ଷଣ ହେଉଛି  ହାଟପଦାରେ ସ୍ଥାପିତ ବିଶାଳ କଂସ ଦରବାର। ଏହି ଭବ୍ୟ ମଞ୍ଚଟି ପ୍ରାୟ ୭୦ ଫୁଟ ଉଚ୍ଚ ଏବଂ ୧୨୦ ଫୁଟ ଚଉଡ଼ାର ଏକ ବିଶାଳ ମଞ୍ଚ। ଏଠାରେ ରାଜା କଂସ କୃଷ୍ଣକୁ ମାରିବାକୁ ପାଞ୍ଚିଥାନ୍ତି ଯୋଜନା । ସୂଚନା ଅନୁସାରେ, ବରଗଡ଼ ଧନୁଯାତ୍ରାର ବିଶ୍ବଦରବାରରେ ନାଁ କମେଇଛି। ଏହାର ରହିଛି ସ୍ବତନ୍ତ୍ର ଗାରିମା। ଏହି ଧନୁଯାତ୍ରା ପାଇଁ ପୂରା ବରଗଡ଼ ସହର ମଧୁରା ପାଲଟିଥିବା ବେଳେ ଅମ୍ବାପାଲି ଗାଁ ହୁଏ ଗୋପପୁର। ପ୍ରଭୁ ଶ୍ରୀକୃଷ୍ଣଙ୍କର ବାଲ୍ୟଲୀଳା ଦେଖିବାକୁ ମିଳିଥାଏ। ଏହି ଯାତ୍ରାକୁ ଦେଖିବା ପାଇଁ ହଜାର ହଜାର ଲୋକଙ୍କ ଭିଡ଼ ଜମିଥାଏ।