Odisha Relief Fund: ୪ ଜିଲ୍ଲାକୁ ୧୦ କୋଟି ଟଙ୍କାର ରିଲିଫ୍‌ ମଞ୍ଜୁର, ତୁରନ୍ତ ବଣ୍ଟନ ପାଇଁ SRCଙ୍କ ନିର୍ଦ୍ଦେଶ

ଭୁବନେଶ୍ୱର: ରିଲିଫ୍‌ ସହାୟତା ପାଇଁ ଓଡ଼ିଶାର ୪ଟି ଜିଲ୍ଲାକୁ ମୋଟ ୧୦ କୋଟି ଟଙ୍କାର ଅର୍ଥ ଆବଣ୍ଟନ କରାଯାଇଛି। ଘର ନିର୍ମାଣ ସହାୟତା, ଫସଲ କ୍ଷତି ଏବଂ ରିଲିଫ୍‌ ଖର୍ଚ୍ଚ ପାଇଁ ଏହି ଅର୍ଥ ଆବଣ୍ଟନ କରାଯାଇଥିବା ନେଇ ସ୍ପେଶାଲ୍ ରିଲିଫ୍ କମିଶନରଙ୍କ କାର୍ଯ୍ୟାଳୟ ପକ୍ଷରୁ ସମ୍ପୃକ୍ତ ଜିଲ୍ଲାପାଳମାନଙ୍କୁ ଚିଠି ଜାରି ହୋଇଛି।

୨୯ ସେପ୍ଟେମ୍ବର ୨୦୨୬ରେ ଜାରି ଚିଠିରେ ଆବଣ୍ଟିତ ଅର୍ଥରାଶିକୁ ଶୀଘ୍ର ବଣ୍ଟନ କରିବା ପାଇଁ ଗଞ୍ଜାମ, ଗଜପତି, ନବରଙ୍ଗପୁର ଓ ଝାରସୁଗୁଡ଼ା ଜିଲ୍ଲାପାଳଙ୍କୁ ନିର୍ଦ୍ଦେଶ ଦିଆଯାଇଛି।

କେଉଁ ଜିଲ୍ଲାକୁ କେତେ ଟଙ୍କା?
ଆବଣ୍ଟନ ହୋଇଥିବା ମୋଟ ୧୦ କୋଟି ଟଙ୍କା ମଧ୍ୟରୁ ନବରଙ୍ଗପୁରକୁ ୫ କୋଟି ଟଙ୍କା ମିଳିଛି। ସେହିପରି ଗଞ୍ଜାମକୁ ୨ କୋଟି, ଗଜପତିକୁ ୨ କୋଟି ଏବଂ ଝାରସୁଗୁଡ଼ାକୁ ୧ କୋଟି ଟଙ୍କା ଆବଣ୍ଟନ କରାଯାଇଛି।

ସମ୍ପୃକ୍ତ ଜିଲ୍ଲାଗୁଡ଼ିକରେ ଆବଣ୍ଟିତ ଅର୍ଥରାଶି ବଣ୍ଟନ ପ୍ରକ୍ରିୟାକୁ ତ୍ୱରାନ୍ୱିତ କରିବାକୁ ଚିଠିରେ କୁହାଯାଇଛି। ଯୋଗ୍ୟ ହିତାଧିକାରୀଙ୍କୁ ନିର୍ଦ୍ଧାରିତ ନିୟମ ଓ ନିର୍ଦ୍ଦେଶାବଳୀ ଅନୁଯାୟୀ ଯଥାଶୀଘ୍ର ରିଲିଫ୍‌ ସହାୟତା ଯୋଗାଇ ଦେବାକୁ କୁହାଯାଇଛି।

ଏଥିସହିତ, ଆବଣ୍ଟିତ ଅର୍ଥର ଖର୍ଚ୍ଚ ଏବଂ ବ୍ୟବହାରିକ ସ୍ଥିତି ସମ୍ପର୍କରେ ଆବଶ୍ୟକ ତଥ୍ୟ SRC କାର୍ଯ୍ୟାଳୟକୁ ଦାଖଲ କରିବାକୁ ମଧ୍ୟ ନିର୍ଦ୍ଦେଶ ରହିଛି। ଏହି ମାମଲାକୁ ‘Most Urgent’ ଭାବେ ଗ୍ରହଣ କରିବାକୁ ଚିଠିରେ ଉଲ୍ଲେଖ କରାଯାଇଛି।