Bilkis Bano Case: ବିଲକିସ୍ ବାନୋ ଗଣଦୁଷ୍କର୍ମ ଓ ତାଙ୍କ ପରିବାରକୁ ହତ୍ୟା ମାମଲାରେ ଦୁଇ ଦୋଷୀଙ୍କୁ ସୁପ୍ରିମକୋର୍ଟରୁ ଜାମିନ ମିଳିଛି। ଉଭୟଙ୍କ ଆଜୀବନ କାରାଦଣ୍ଡକୁ ସ୍ଥଗିତ ରଖିବା ସହ ଜାମିନ ପ୍ରଦାନ କରିଛନ୍ତି ସର୍ବୋଚ୍ଚ ନ୍ୟାୟାଳୟ। ୧୭ ବର୍ଷରୁ ଅଧିକ ସମୟ ଜେଲ୍ରେ ରହିବା ଏବଂ ଜଣେ ଦୋଷୀଙ୍କ ଗୁରୁତର ଶାରୀରିକ ଦିବ୍ୟାଙ୍ଗତାକୁ ଜାମିନ ପ୍ରଦାନର ଆଧାର ଭାବେ ବିଚାର କରାଯାଇଛି।
ଜଷ୍ଟିସ୍ ଏମ୍.ଏମ୍. ସୁନ୍ଦରେଶ ଏବଂ ଜଷ୍ଟିସ୍ ପ୍ରସନ୍ନା ବି. ବରାଲେଙ୍କ ଖଣ୍ଡପୀଠ ଅକ୍ଟୋବର ୨୮ ତାରିଖରେ ଏହି ଆଦେଶ ଦେଇଛନ୍ତି। ଜାମିନ ପାଇଥିବା ଦୁଇ ଦୋଷୀ ହେଉଛନ୍ତି ବିପିନଚନ୍ଦ୍ର କହ୍ନୈୟାଲାଲ ଯୋଶୀ ଏବଂ ପ୍ରଦୀପ ରମଣଲାଲ ମୋଧିଆ। ଏହି ଦୁଇଜଣ ୧୧ ଜଣ ଦୋଷୀଙ୍କ ମଧ୍ୟରେ ସାମିଲ ଥିଲେ, ଯେଉଁମାନଙ୍କର ଆଗୁଆ ମୁକ୍ତିକୁ ୨୦୨୪ ଜାନୁଆରୀରେ ସୁପ୍ରିମକୋର୍ଟ ରଦ୍ଦ କରିଥିଲେ।
#BREAKING Supreme Court grants bail to two convicts in Bilkis Bano gang rape and murder case Court has suspended life sentences of Bipinchand Joshi and Pradip Modhiya, noting that both spent over 17 years in prison and one has a severe disability The two were among 11 convicts whose premature release was cancelled by the Supreme Court in 2024
— Nabila Jamal (@nabilajamal_) November 16, 2026
ଶୁଣାଣି ସମୟରେ ଦୋଷୀଙ୍କ ପକ୍ଷରୁ ଯୁକ୍ତି ଦର୍ଶାଯାଇଥିଲା ଯେ, ଜଣେ ଦୋଷୀଙ୍କ ନାମ ଏଫ୍ଆଇଆର୍ରେ ନଥିଲା ଏବଂ ଘଟଣାର ପ୍ରାୟ ତିନି ବର୍ଷ ପରେ ତାଙ୍କୁ ଅଭିଯୁକ୍ତ ସାବ୍ୟସ୍ତ କରାଯାଇଥିଲା। ଅନ୍ୟପକ୍ଷରେ ଗୁଜରାଟ ସରକାର ଜାମିନ ଆବେଦନକୁ ବିରୋଧ କରିଥିଲେ।
ତେବେ ଦୁଇ ଦୋଷୀଙ୍କ ଦୋଷସିଦ୍ଧି ବିରୋଧରେ ଦାଖଲ ହୋଇଥିବା ଆବେଦନର ଶୁଣାଣି ଜାରି ରହିବ ବୋଲି ସୁପ୍ରିମକୋର୍ଟ ସ୍ପଷ୍ଟ କରିଛନ୍ତି। ଜାମିନର ସର୍ତ୍ତାବଳୀ ସମ୍ପୃକ୍ତ ଟ୍ରାଏଲ୍ କୋର୍ଟ ନିର୍ଦ୍ଧାରଣ କରିବେ। ଅର୍ଥାତ୍ ଜାମିନ ମିଳିଥିଲେ ମଧ୍ୟ ଦୋଷସିଦ୍ଧି ବିରୋଧୀ ଆବେଦନ ଉପରେ ଆଇନଗତ ପ୍ରକ୍ରିୟା ଜାରି ରହିବ।
କ'ଣ ଥିଲା ବିଲକିସ୍ ବାନୋ ମାମଲା?
୨୦୦୨ ମସିହାରେ ଗୋଧ୍ରା ଟ୍ରେନ୍ ଅଗ୍ନିକାଣ୍ଡ ପରେ ଗୁଜରାଟରେ ଭୟାବହ ଦଙ୍ଗା ଘଟିଥିଲା। ଏହି ଦଙ୍ଗା ସମୟରେ ବିଲକିସ୍ ବାନୋଙ୍କୁ ଗଣଦୁଷ୍କର୍ମ କରାଯିବା ସହ ତାଙ୍କ ପରିବାରର ୭ ଜଣ ସଦସ୍ୟଙ୍କୁ ହତ୍ୟା କରାଯାଇଥିଲା। ଘଟଣା ସମୟରେ ବିଲକିସ୍ ବାନୋଙ୍କୁ ୨୧ ବର୍ଷ ବୟସ ହୋଇଥିବା ବେଳେ ସେ ପାଞ୍ଚ ମାସର ଗର୍ଭବତୀ ଥିଲେ। ଏହି ସମ୍ବେଦନଶୀଳ ମାମଲାରେ ସୁପ୍ରିମକୋର୍ଟଙ୍କ ସଦ୍ୟତମ ଜାମିନ ଆଦେଶ ପୁଣିଥରେ ଦେଶବ୍ୟାପୀ ଚର୍ଚ୍ଚା ସୃଷ୍ଟି କରିଛି।