Keonjhar News: ୪ଦିନ ଧରି ଶ୍ରଦ୍ଧାଳୁଙ୍କୁ ସୁନାବେଶରେ ଦର୍ଶନ ଦେବେ ମାଆ ତାରିଣୀ

(ଅଭୟ ମହାନ୍ତି/କେନ୍ଦୁଝର)Keonjhar News: ଆସିଛି ପାର୍ବଣ। ମହାମାୟାଙ୍କ ଆଗମନରେ ପୁଲକିତ ହୋଇ ଉଠିଛି ଧରା। ଆଜି ବିଭିନ୍ନ  ଶକ୍ତିପୀଠରେ ମହାଷ୍ଟମୀ ପୂଜା  ଚାଲିଥିବା ବେଳେ  ମଣ୍ତପରେ ଚାଲିଛି ଅଷ୍ଟମୀ ପୂଜା। ମାଆଙ୍କ ଷୋଡ଼ଶ ରୀତିନୀତି ଅନୁଯାୟୀ ସ୍ୱତନ୍ତ୍ର ପୂଜାର୍ଚ୍ଚନା ଚାଲିଛି। ଏ ଅବସରରେ ଦଶହରା ଅବସରରେ ପ୍ରକମ୍ପିତ ହେବ ଘଟଗାଁ ମାଆ ତାରିଣୀଙ୍କ ପୀଠ। ସପ୍ତମୀ ଠାରୁ ଦଶମୀ ଯାଏ ୪ଦିନ ଧରି ଶ୍ରଦ୍ଧାଳୁଙ୍କୁ ସୁନାବେଶରେ ଦର୍ଶନ ଦେବେ ମାଆ ।

କେନ୍ଦୁଝର ଜିଲ୍ଲାର ପ୍ରମୁଖ ଶକ୍ତିପୀଠ ଘଟଗାଁର ମାତାରିଣୀଙ୍କ ମନ୍ଦିର । ମନ୍ଦିର ପରିସରରେ ଦେବୀ ଦୁର୍ଗାଙ୍କର ମୃଣ୍ମୟୀ ମୂର୍ତ୍ତି ତିଆରିରେ ବ୍ୟସ୍ତ କାରିଗର । ଦେବୀ ଦୁର୍ଗାଙ୍କର ମୂର୍ତ୍ତି ସହିତ ପାର୍ଶ୍ଵ ଦେବା, ଦେବୀଙ୍କୁ ମଧ୍ୟ ଆକର୍ଷଣୀୟ ରଙ୍ଗରେ କାରିଗର ସଜ୍ଜିତ କରୁଛନ୍ତି । ଏଥିପାଇଁ ସୁଉଚ୍ଚ ତୋରଣ କାମ ଶେଷ ହୋଇଥିବା ବେଳେ, ଦୁଇ ପାର୍ଶ୍ଵରେ ଶ୍ରଦ୍ଧାଳୁଙ୍କୁ ଆକୃଷ୍ଟ କରିବା ପାଇଁ ବିଭିନ୍ନ ମୂର୍ତ୍ତି ତିଆରି ଶେଷ ପର୍ଯ୍ୟାୟରେ ପହଞ୍ଚଛି । ଦଶହରା ଅବସରରେ ଘଟଗାଁ ମାତାରିଣୀଙ୍କ ସୁନାବେଶ ଦର୍ଶନ କରିବା ସହିତ ଦେବୀ ଦୁର୍ଗାଙ୍କୁ ଦର୍ଶନ କରିବାର ସୌଭାଗ୍ୟ ଲାଭ କରିବେ ଶ୍ରଦ୍ଧାଳୁ ।

ALSO READ: Weather News: ଅକ୍ଟୋବର ଶେଷରେ ବାତ୍ୟା! ଜାଣନ୍ତୁ କେଉଁଠି କରିବ ଲ୍ୟାଣ୍ତଫଲ୍

ALSO READ: Chorbagan Puja Stampede Death Toll:କୋଲକାତାରେ ଚୋରବାଗାନ୍ ଦୁର୍ଗାପୂଜା ମଣ୍ତପରେ ଦଳାଚକଟା, ମୃତ୍ୟୁ ସଂଖ୍ୟା ୧୯କୁ ବୃଦ୍ଧି

ଅନ୍ୟ ଦେବୀପୀଠ ଙ୍କ ଠାରୁ ଘଟଗାଁ ମାତାରିଣୀଙ୍କ ପୀଠରେ ରହିଛି ଭିନ୍ନ ପରମ୍ପରା । ପୂଜା ମଣ୍ଡପରେ ଅନୁଷ୍ଠିତ ହେଉଥିବା ସପ୍ତମୀ ଦିନଠାରୁ ବିଜୟାଦଶମୀ ଯାଏ ଏଠାରେ ମା ତାରିଣୀ ସୁନାବେଶରେ ଶ୍ରଦ୍ଧାଳୁଙ୍କୁ ଦର୍ଶନ ଦେଇଥାନ୍ତି । ଏହି ୪ଦିନ ଧରି ପୀଠରେ ମାଙ୍କର ସ୍ୱତନ୍ତ୍ର ପୂଜାର୍ଚ୍ଚନା ସହିତ ଚଣ୍ଡୀପାଠ କରାଯାଏ । ସପ୍ତମୀ ଦିନ ଭଜନ ସମାରୋହ, ଅଷ୍ଟମୀ ଠାରୁ ଦଶମୀ ଯାଏ ୩ଦିନ ଧରି ବାଦୀପାଲା ଏବଂ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ । ଦୁର୍ଗାପୂଜା ଅବସରରେ ଏଠାରେ ଲକ୍ଷାଧିକ ଭକ୍ତଙ୍କର ସମାଗମକୁ ଦୃଷ୍ଟିରେ ରଖି ମନ୍ଦିର ପ୍ରଶାସନ ତରଫରୁ ଭକ୍ତଙ୍କର ଶୃଙ୍ଖଳିତ ଦର୍ଶନ ପାଇଁ ସମସ୍ତ ବ୍ୟବସ୍ଥା କରାଯାଉଥିବା କହିଛନ୍ତି ମନ୍ଦିର କାର୍ଯ୍ୟନିର୍ବାହୀ ଅଧିକାରୀ ।