ଜଗତସିଂହପୁର: (ନାରାୟଣ ବେହେରା) ଗତ କିଛିଦିନ ହେବ ଜଗତସିଂହପୁର ଜିଲ୍ଲା କୁଜଙ୍ଗ ପୋଲିସର ନିଦ ହଜାଇ ଦେଇଥିବା ଏକ ଚୋର ଗ୍ୟାଙ୍ଗକୁ ଧରିବାରେ ସଫଳ ହୋଇଛି କୁଜଙ୍ଗ ପୋଲିସ। ଦିନରେ ଛେଳି ଓ ଘୁଷୁରୀ ଚରାଉଥିଲେ ଆଉ ରାତି ହେଲେ କବାଟ ତାଡି କରୁଥିଲେ ସୁନା ଟଙ୍କା ଲୁଟ୍। କୁଜଙ୍ଗ ପୋଲିସର ନିଦ ହଜାଇ ଦେଇଥିଲେ କିଛି ଲୁଟେରା । ଏପରିକି ସ୍ଥାନୀୟ ଲୋକଙ୍କ ସହିତ ରଖିଥିଲେ ଭଲ ସମ୍ପର୍କ, ଯେପରିକି ସେମାନଙ୍କ ଉପରେ କୌଣସି ଘଟଣାରେ ସାଧାରଣ ଲୋକଙ୍କ ସନ୍ଦେହ ହେବନାହିଁ ସେଥିପାଇଁ ସତର୍କତା ଅବଲମ୍ବନ କରି ଚାଲୁଥିଲେ।
ଗତ ୬ ମାସ ମଧ୍ୟରେ ୧୬ ଜଣଙ୍କ ଘରୁ କଳା କନା ବୁଲାଇ ଦେଇଥିଲେ ଏହି ଚୋର ଗ୍ୟାଙ୍ଗ । କୁନା ଦାସ, ବିଦେଶୀ ଦାସ, ଇନ୍ଦ ଦାସ , ବର୍ଷା ଦାସ ଓ ବିଜୟ ଦାସଙ୍କ ସମେତ ଏମାନଙ୍କ ନିକଟରୁ ଚୋରି ସମାଗ୍ରୀ କିଣି ଥିବା ଅଭିଯୋଗରେ ସୁନା ବ୍ୟବସାୟୀ କାଶୀନାଥ ସାମଲଙ୍କୁ ପୋଲିସ ଗିରଫ କରିଛି । ସେମାନଙ୍କ ନିକଟରୁ ୭୮ଟି ସୁନା ମୁଦି, ଆଠଟି ସୁନା ଚେନ, ଗୋଟିଏ କାନ ଫୁଲ ସହିତ ୩୮ ହଜାର ନଗଦ ଟଙ୍କା ମଧ୍ଯ ଜବତ କରିଛି ପୋଲିସ । ଏମାନେ ଛେଳି ଚରାଇବା ଓ ଘୁଷୁରୀ ଜଗିବା ଅଭିନୟରେ ସିଦ୍ଧ ହସ୍ତ ଥିବାବେଳେ ଏମାନଙ୍କୁ ପୋଲିସ ଜାଣିବା ପାଇଁ ନାକେଦମ ହୋଇ ପଡିଥିଲା । ସବୁଠାରୁ ଗୁରୁତ୍ୱପୂର୍ଣ୍ଣ କଥା ଏହି ଚୋରି ଗ୍ୟାଙ୍ଗର ସମସ୍ତ ସଦସ୍ୟ କେନ୍ଦ୍ରାପଡ଼ା ଅଞ୍ଚଳର ଏବଂ ସେମାନଙ୍କ ନାମରେ ବିଭିନ୍ନ ଥାନାରେ ବହୁ କେସ୍ ମଧ୍ୟ ରହିଛି ବୋଲି ଏକ ସାମ୍ବାଦିକ ସମ୍ମିଳନୀରେ ତିର୍ତ୍ତୋଲ ଏସଡିପିଓ ଅଜୟ କୁମାର ଦାସ ପ୍ରକାଶ କରିଛନ୍ତି।